Qaı óńirlerde sý qoımasy 100 paıyz tolyp tur

ASTANA. KAZINFORM - Sý resýrstary jáne ırrıgatsııa mınıstrligi elimizdiń sý qoımalaryndaǵy qazirgi jaǵdaıdy baıandady. 

«Qazsýshar» mekemesiniń Batys Qazaqstan fılıalynyń mamandary tasqyn sýyn qaýipsiz ótkizý is-sharalaryn atqaryp jatyr.

Aımaqta sý tasqynynyń ekinshi kezeńi jalǵasýda. Oblystyń tórt iri sý qoımasy 90%-ǵa toldy.

Oral qalasyndaǵy Jaıyq ózeniniń deńgeıi — 838 sm. Ol bir táýlikte 8 sm-ge tómendedi.

Aqmola oblysynda Astana jáne Sileti sý qoımalary 100%-ǵa toly. Eki nysan da shtattyq kestege saı jumys isteıdi.

Aımaqta sý tasqynynyń belsendi kezeńi ótti. Astana kontrrettegishinen Esil ózenine táýligine 4,75 mln tekshe metr sý jiberiledi.

Soltústik Qazaqstan oblysyndaǵy 2 iri sý qoımasy 100%-ǵa toly jáne tranzıttik rejımde jumys istep tur. Esil ózeninde sý tasqynynyń ekinshi kezeńi jalǵasýda.

Sergeev sý qoımasynyń jotasy arqyly sýdyń asyp ketý bıiktigi 175 sm–ge deıin tómendedi. Petropavl qalasynyń shegindegi Esil ózeniniń deńgeıi-1299 sm. Bir táýlikte ol 6 sm-ge tómendedi.

Aqtóbe oblysynda eki iri sý qoımasynyń ortasha sý jınaý kórsetkishi — 97%. Eki nysan da shtattyq kestege saı jumys isteıdi. Munda sý tasqynynyń belsendi kezeńi ótti.

Shyǵys Qazaqstan oblysyndaǵy eki iri sý qoımasy boıynsha ortasha sý jınaý kórsetkishi — 83%. Sý tasqyny jalǵasýda.

Abaı oblysynda Shúlbi sý qoımasy 40%-ǵa toldy. Aımaqta sý tasqyny jalǵasýda. Shúlbi sý qoımasyna búıirlik salalardyń ulǵaıýyna baılanysty Ertis ózenine sý jiberilip jatyr.

Qaraǵandy oblysynda 3 iri sý qoımasy 98,4%-ǵa toly. Olardyń barlyǵy shtattyq rejımde jumys isteıdi. Sý tasqynynyń belsendi kezeńi ótti.

Qostanaı oblysyndaǵy eki iri sý qoımasynyń ortasha sý jınaý kórsetkishi — 92%. Eki nysan da shtattyq kestege saı jumys isteıdi. Aımaqtaǵy sý tasqynynyń belsendi kezeńi ótti.

Sý qoımalarynda «Qazsýshar» mamandary táýlik boıy kezekshilik uıymdastyryp, monıtorıng jasap otyr.