Qaı óńirlerde kadr tapshylyǵy týyndaıdy — mınıstrlik boljamy
ASTANA. KAZINFORM — Aldaǵy jyldary elimizdiń qaı óńirlerinde kadr tapshylyǵy týyndaýy múmkin? Bul saýalǵa Eńbek jáne halyqty áleýmettik qorǵaý vıtse-mınıstri Oljas Anafın jaýap berdi.
— 2030 jyly jumys kúshi 10 mıllıon adamǵa, 2037 jyly 11 mıllıonǵa, al 2044 jyly 12 mıllıon adamǵa jetedi dep kútilýde. Negizgi eńbek resýrstarynyń aǵyny megapolısterde saqtalady. 2030 jylǵa qaraı óńirlerde jumys kúshiniń usynysy 2024 jylmen salystyrǵanda 530 myń adamǵa, al 2040 jylǵa qaraı 1,9 mıllıon adamǵa artady. Osyǵan baılanysty soltústik óńirlerdegi jumys kúshiniń sany 2030 jyly 64 myń adamǵa, 2040 jyly 115 myń adamǵa azaıýy múmkin. Ortalyq jáne shyǵys óńirlerde kórsetkish sáıkesinshe 53 myń jáne 125 myń adamǵa qysqarady, — dedi Oljas Anafın Senat qabyrǵasynda ótken is-shara barysynda.
Odan ári vıtse-mınıstr 2050 jylǵa qaraı eńbek naryǵynda bolatyn ózgeristerge toqtaldy.
— Bizdiń boljamy boıynsha qazirgi úrdister saqtalǵan jaǵdaıda 2050 jylǵa qaraı Astana, Almaty jáne Shymkent qalalarynda jumys kúshiniń usynysy eki ese artady, al soltústik, ortalyq jáne shyǵys óńirlerde bul kórsetkish 18%-ǵa qysqarady, — dep boljap otyr mınıstrdiń orynbasary.
Onyń aıtýynsha, eńbek naryǵyna týý kórsetkishteri áser etedi.
— 1999 jyly Qazaqstanda 217 myń bala dúnıege kelgen;
— 2004 jyly — 273 myń bala;
— 2010 jyly — 367 myń bala.
Qazir jáne aldaǵy jyldary atalǵan býyn ókilderi eńbek naryǵyna qosyla bastaıdy.
— 2025 jyly eńbek naryǵyna 265 myń adam shyǵady;
— 2028 jyly olardyń sany 300 myńnan asady;
— 2030 jyldan bastap jyl saıyn 350 myńnan astam adam eńbek naryǵyna qosylady. Sáıkesinshe jumys kúshine suranys artady.
Mınıstr orynbasarynyń aıtýynsha, keıbir óńirde eńbek resýrstarynyń tapshylyǵy baıqalýda jáne ol úrdis ýaqyt óte kele kúsheıe túsedi. Sonymen qatar, keıbir óńirdiń shekaraǵa jaqyndyǵy jáne kórshi elderdegi eńbek naryǵyndaǵy kúrdeli jaǵdaı kadr tapshylyǵyn odan ári arttyrýy múmkin.
Buǵan deıin elimizden qandaı sala mamandarynyń ketip jatqany týraly habarlaǵan bolatynbyz.
Odan bólek, jıyn barysynda qazaqstandyqtardyń soltústik óńirlerden kóshýi jalǵasyp jatqany aıtyldy.