Qaı óńirlerde bilim sapasy joǵary kórsetkishke jetti
ASTANA. KAZINFORM — Óńirlik bóliniste Shyǵys Qazaqstan, Almaty, Jambyl, Mańǵystaý jáne Pavlodar oblystary joǵary bilim kórsetkishterin kórsetti. Bul týraly Oqý-aǵartý mınıstrliginiń baspasóz qyzmeti habarlady.
Oqý-aǵartý mınıstrliginde kezekti apparattyq jıyn ótti. Jıyn barysynda mınıstrlik basshylyǵy úshinshi toqsannyń qorytyndysyna sáıkes bilim sapasyna taldaý jasap, mektepterdegi tárbıe jumystarynyń barysyn, sonyń ishinde Memleket basshysy Qasym-Jomart Toqaevtyń tapsyrmasymen júzege asyrylǵan «Adal azamat» birtutas tárbıe baǵdarlamasynyń oryndalýyn talqylady.
«Adal azamat» baǵdarlamasy aıasynda elimizdiń barlyq óńirlerinde «Zań jáne tártip», «Taza Qazaqstan» qaǵıdattaryna negizdelgen aýqymdy is-sharalar uıymdastyryldy. Oqý jylynyń úshinshi toqsanynda oqýshylar rýhanı-adamgershilik qundylyqtardy nyǵaıtýǵa baǵyttalǵan ıntellektýaldyq oıyndarǵa, mamandyqtar marafonyna, debattar men startap baıqaýlaryna belsendi qatysty. Sonymen qatar «Shyn júrekten kitap syıla» jáne «Ananyń aıaly alaqany» sekildi chellendjder mektep qabyrǵasyndaǵy tárbıe mazmunyn baıytyp, ata-analardyń oqý protsesine qatysýyn arttyrýǵa jáne ekologııalyq mádenıetti qalyptastyrýǵa septigin tıgizdi.
Tárbıe jumysynyń tıimdiligin arttyrý maqsatynda bilim berý uıymdaryna «Adal azamat» baǵdarlamasynyń biryńǵaı brendbýgy engizilýde. Mektepterdiń ishki keńistigin brendbýk talaptaryna saı bezendirý jumystary qazirgi tańda Astana qalasy, Aqmola, Aqtóbe, Qyzylorda oblystaryndaǵy mektepterde tolyq oryndaldy. Aldaǵy ýaqytta da mektepterdi bezendirý jumystary elimizdiń barlyq óńirlerinde jalǵasady.
Jıynnyń kelesi mańyzdy bóligi úshinshi toqsandaǵy bilim sapasynyń kórsetkishterine arnaldy. Bul kezeńde oń dınamıka baıqalady. Taldaý nátıjeleri oqýshylardyń bilim sapasy ótken oqý jylynyń osy kezeńimen salystyrǵanda birshama óskenin kórsetip otyr. Bul derekter bilim berý júıesindegi reformalardyń oń nátıje bere bastaǵanyn aıǵaqtaıdy. Óńirlik bóliniste Shyǵys Qazaqstan, Almaty, Jambyl, Mańǵystaý jáne Pavlodar oblystary joǵary bilim kórsetkishterin kórsetti.
Jıyn qorytyndysy boıynsha mınıstr jaýapty qurylym basshylaryna naqty tapsyrmalar berdi.
Aıta ketelik Qazaq Digital Mektebi jobasy aýyl mektepterindegi bilim sapasyn arttyrýǵa jol ashatyny týraly jazǵan edik.