Qaı óńirlerde áli de muǵalim tapshylyǵy bar

ASTANA. KAZINFORM — Oqý-aǵartý mınıstrligi eldegi mektepterde qaı pánder boıynsha muǵalimder jetispeıtinin málimdedi. 

— Elimizde Ulttyq biryńǵaı derekter qory (UBDQ) málimeti boıynsha pedagog kadrlarǵa jalpy qajettilik 5 370 adam boldy. Pedagogter bos ornynyń eń kóp sany Almaty (544), Qaraǵandy (524), Qostanaı (351) oblystarynda, Almaty qalasynda (431), Atyraý (431) oblysynda baıqaldy, — delingen mınıstrliktiń Kazinform agenttigine bergen jaýabynda.

Pánder boıynsha eń kóp bos oryndarǵa toqtalsaq, bastaýysh synyptarda — 747, matematıka — 1061, fızıka — 383, sondaı-aq hımııa páni boıynsha 345 pedagog qajet.

— Bos oryndar aǵymdaǵy sıpatqa ıe jáne ártúrli faktorlarǵa baılanysty. Bul rette turǵylyqty jerin aýystyrý, basqa jumysqa aýysý, bala kútimine baılanysty demalysqa shyǵý, oqýǵa nemese sheteldik taǵylymdamalar, zeınetke shyǵý jáne basqa da sebepter áser etip otyr, — dep atalyp ótken vedomstvo aqparatynda.

Aıta keteıik, buǵan deıin aýyl mektebiniń pedagogteri dırektor bolýdan nege qashqaqtaıtynyn jazǵan edik.