Qaı óńirde halyqtyń sporttyq ınfraqurylymǵa qoljetimdiligi joǵary

ASTANA. KAZINFORM — Jyl sońyna deıi 67 sport nysanynyń qurylysy aıaqtalady. Bul týraly Úkimet otyrysynda Sport jáne týrızm mınıstri Erbol Myrzabosynov aıtty.

- Sporttyq ınfraqurylymdy damytý jáne halyqtyń sportqa qoljetimdiligin arttyrý – mınıstrliktiń negizgi baǵyttarynyń biri. Sporttyq ınfraqurylym – bul azamattardyń dene shynyqtyrýmen, sportpen jáne belsendi demalyspen aınalysýyna arnalǵan nysandar men úı-jaılardyń jıyntyǵy. Oǵan jabyq jáne ashyq sport nysandarynyń 20 túri kiredi. Búginde el boıynsha 25 760 sport ǵımaraty bar. Onyń ishinde memlekettik menshikte – 23 678, jeke menshikte – 2082 nysan. 1 298 nysan jóndeýdi qajet etedi, - dedi ol.

Mınıstrdiń aıtýynsha, sońǵy jyldary sport nysandaryn jobalaý men paıdalanýda jańa standarttar engizilip jatyr. Olar nysandardyń qoljetimdiligin, energııa tıimdiligin jáne ámbebaptyǵyn arttyrýǵa baǵyttalǵan.

- Qoldanystaǵy ádisnamaǵa sáıkes, halyqtyń sporttyq ınfraqurylymmen qamtamasyz etilýi 1 000 adamǵa shaqqanda 80 sharshy metr sport zaly jáne 25 sharshy metr basseın sýy boıynsha esepteledi. 2024 jyldyń qorytyndysy boıynsha halyqtyń sporttyq ınfraqurylymǵa qoljetimdiligi 55,1 paıyz boldy. Eń joǵary kórsetkishter Pavlodar, Jambyl jáne Qaraǵandy oblystarynda, - dedi Erbol Myrzabosynov.

Onyń aıtýynsha, mınıstrlik ákimderdiń sportqa jaýapty orynbasarlary men federatsııa basshylary úshin tıimdiliktiń negizgi kórsetkishterin engizip jatyr. Negizgi kórsetkishterdiń biri – sporttyq ınfraqurylymdy damytý deńgeıi jáne azamattardy buqaralyq sportqa tartý úlesi.

- 2025 jyldyń 9 aıynda 35 sport nysany salyndy. Jyl sońyna deıin taǵy 67 nysannyń qurylysyn aıaqtaý josparlanǵan. Túrkistan qalasynda halyqaralyq deńgeıdegi Eskek esý arnasynyń qurylysy aıaqtaldy. Bul nysan esý jáne akademııalyq esý sporttaryn, sondaı-aq týrızmdi damytýǵa múmkindik beredi. Elordada Ulttyq sport ýnıversıtetiniń qurylysy aıaqtalýǵa jaqyn. Ýnıversıtet tek oqý orny ǵana emes, sonymen birge kópsalaly sport jáne ǵylymı ortalyq bolady. Bul elimizdiń sport ındýstrııasynyń damýyna jáne óńirlik ári halyqaralyq yntymaqtastyqtyń nyǵaıýyna yqpal etedi. Nysandy paıdalanýǵa berý 2025 jyldyń jeltoqsanynda josparlanǵan, - dedi mınıstr.

Aıta keteıik, Úkimet egin jınaý naýqanyn qorytyndylap, sporttyq ınfraqurylymdy damytý máselesin pysyqtap jatyr.