Qaı óńirlerde bastaýysh synyp oqýshylary tegin tamaqpen qamtylǵan
NUR-SULTAN. QazAqparat – Elimizdegi bastaýysh synyp oqýshylaryn tolyqtaı tegin tamaqpen qamtamasyz etý úshin jyl saıyn bıýdjetten 150 mlrd teńge kerek bolady. Bul týraly depýtattyq saýalǵa jaýap berý kezinde QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.
1-4 synypta oqıtyn 607 myńnan astam oqýshy (41%) tegin ystyq tamaqpen qamtamasyz etilgen. Onyń ishinde 100 paıyz deńgeıde Nur-Sultan, Shymkent qalalarynda, Atyraý, Batys Qazaqstan, Qaraǵandy, Pavlodar oblystarynda, sondaı-aq Aqmola, Mańǵystaý oblystarynyń birinshi synyp oqýshylary qamtylǵan.
Al bıyl qyrkúıek aıynan bastap Almatyda 1-4 synyp oqýshylaryna tegin tamaq beriledi.
E. Toǵjanovtyń aıtýynsha, ár oqýshyny tegin tamaqpen qamtamasyz etý máselesin sheshý kezeń-kezeńmen iske asyrylady. Bastaýysh synyptardaǵy 1,5 mln balany 100 paıyz bir rettik tamaqtandyrýmen qamtý úshin jyl saıyn qosymsha 150 mlrd teńge kerek bolady. Al 1-11 synyp oqýshylaryn qamtýǵa jylda qosymsha 380 mlrd teńgeden astam qajet.
Budan buryn habarlanǵandaı, jańa oqý jylynda Almaty qalasynyń 1-4 synyp oqýshylary tegin ystyq tamaqpen qamtylady.
