Qaı óńirde maskúnemder kóp
ASTANA. QazAqparat - Elimiz aýmaǵynda jasalatyn barlyq qylmystyń 14 paıyzyna ishimdik sebepker. Bul týraly búgin halyqpen eseptik kezdesý ótkizgen QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Qylmystyń oryn alýynyń basty sebepteriniń biri - maskúnemdik, esirtkige áýestik, otbasylyq-turmystyq qolaısyz ahýal, turaqty tabystyń bolmaýy. Qazirgi ýaqytta ýchaskelik ınspektorlardyń aldyn alý baqylaýynda 67 myńnan astam maskúnem, 10 myń qolaısyz otbasy bar. Olarda 15 myńnan astam bala turady. Qolaısyz otbasylardaǵy jıi janjaldardyń saldarynan kisi óltirý jáne turmystyq aýyr qylmystar arta túsedi. Jyl boıy elimizde kún saıyn maskúnemdiktiń, ásirese, otbasydaǵy turmystyq janjaldardyń saldarynan 2-3 aýyr qylmys tirkeledi», - dedi mınıstr.
Onyń aıtýynsha, elimizdiń aýmaǵynda jasalatyn barlyq qylmystyń 14 paıyzyna ishimdik sebepker. Maskúnemdik saldarynan jasalatyn qylmystar birqatar óńirde joǵary bolyp otyr. Atap aıtqanda, maskúnemdik saldarynan jasalatyn qylmystar Aqtóbe oblysynda - 28, Qostanaı bolysynda - 25,5, Pavlodar oblysynda - 22, Mańǵystaý oblysynda - 20 jáne Aqtóbe oblysynda 19,5 paıyzdy quraıdy.
«Biz baqylaýdy kúsheıtip, ýchaskelik ınvestorlarymyzdyń jumysyn jetildirip jatqanymyz sózsiz. Makúnemdikpen kúreste ákimdiktermen birlesip, quqyq buzýshylyqtardyń aldyn alý jónindegi oblystyq, qalalyq jáne aýdandyq komıssııalardyń jumystaryn jandandyrý boıynsha sharalar qabyldaımyz», - dedi Qasymov.
Mınıstrdiń aıtýynsha, maskúnemdikten májbúrlep emdeý júıesiniń tıimsizdigi kúrdeli problemanyń birine aınalyp otyr. Sebebi, birinshiden elimizde nebári 22 narkologııalyq uıymda 2470 maskúnemdi emdeýge ǵana oryn bar.
«Ótken jyly májbúrlep emdeýge 5200 maskúnem jiberildi. Alaıda olardyń 700-den astamy orynnyń jetispeýshiliginen emdeýden ótken joq. Ekinshiden, maskúnemderdi atalǵan mekemelerge jiberý protsedýrasynyń ózinde de formaldy kedergiler jetip artylady. Bul problemany ákimdiktermen jáne múddeli organdarmen birlesip sheshý qajet», - dedi ol.
