Qaı óńir mektepteri karantın talabyn jıi buzady
NUR-SULTAN. QazAqparat – Qazaqstanda koronavırýstyń taralýyna jol bermeý jónindegi vedomstvoaralyq komıssııa el mektepterinde karantın talaptarynyń saqtalýyna júrgizilip jatqan monıtorıng nátıjelerin aıtty, dep habarlaıdy QazAqparat.
«Oqý jylynyń III toqsanynda 11 qańtar men 1 sáýir aralyǵynda 5 213 tekseris júrgizildi. Nátıjesinde 575 mektepte karantın talaptaryn buzýshylyq anyqtaldy. Bul, elimiz boıynsha 11,0% quraıdy», - delingen aqparatta.
Karantın rejıminiń talabyn buzatyn mektepterde kelesi faktiler anyqtaldy:
- kóp jaǵdaıda tańerteńgilik tekserý– oqýshylardy irikteý júrgizilmegen;
- oqý oryndarynyń qyzmetkerleri maska rejımin saqtamaǵan;
- birqatar mektepte araqashyqtyq belgileri qoıylmaǵan;
- bólmelerge ylǵaldy tazalaý jáne zalalsyzdandyrý júrgizý kestesi buzylǵan;
- synyptarda partalar arasyndaǵy qashyqtyq saqtalmaǵan;
- bakterıtsıdtik shamdar, sanıtaızerler men zalalsyzdandyrý quraldary jetkiliksiz;
- paıdalanylǵan maskalarǵa arnalǵan qoqys ýrnalary jetkiliksiz.
Osy jyldyń 16-22 sáýiri aralyǵynda monıtorıngilik toptar mektepterge 439 tekserý júrgizgen. Karantın talaptaryn buzýshylyq 80 mektepte anyqtaldy, ıaǵnı 18,2% karantın rejımi tártibin buza otyryp jumys jasaǵan.
Mekteptegi karantın talabyn jıi buzǵan óńirler:
- Qaraǵandy oblysy – 26 buzýshylyq;
- Túrkistan oblysy – 15;
- Qyzylorda oblysy – 12;
- Shymkent qalasy– 9;
- ShQO – 8.
«Anyqtalǵan barlyq karantındik, sanıtarııalyq-gıgıenalyq talaptardy buzýshylyqtar boıynsha QR ÁQBtK-niń 425-babyna sáıkes 99 tulǵaǵa jalpy kólemi 17 784 764 teńge ákimshilik aıyppul salyndy», - delingen vedomstvoaralyq komıssııa aqparatynda.
