Qaı oblystyń memqyzmetshileri jazaǵa kóbirek tartyldy
ASTANA. QazAqapart - Memlekettik qyzmetshiler arasynda ádeptik quqyq buzýshylyqtardyń sany azaıdy. Bul týraly «QazAqparat» HAA-ǵa QR Memlekettik qyzmet isteri jáne sybaılas jemqorlyqqa qarsy is-qımyl agenttiginen habarlady.
«Búgingi tańda memlekettik qyzmetshilerdiń ádeptiligin joǵarylatýda jáne quqyqtarynyń saqtalýyn qamtamasyz etýde Ádep jónindegi keńester jáne ýákilder sheshýshi ról atqarady. Olardyń qyzmeti tolyǵymen ádeptilik buzýshylyqtaryn aldyn alýǵa, memlekettik qyzmetshilerdiń quqyqtaryn jáne múddelerin qorǵaýǵa, ujymda qolaıly moraldyq-psıhologııalyq ahýal qalyptastyrýǵa baǵyttalǵan. Jalpy alǵanda, aldyn alý sharalary tártiptik tájirıbede oń ózgeristerge ákeldi, jekelegen baǵyttarda ádeptik quqyq buzýshylyqtardyń sany azaıdy. Qyzmettik avtokólikterdi jeke maqsatta paıdalaný faktileriniń, áleýmettik jelilerde ádepsiz minez-qulyqqa baılanysty buzýshylyqtardyń sany edáýir tómendedi. Aǵymdaǵy jyly tek biren-saran jaǵdaılar tirkelgen», - delingen agenttik málimetinde.
Osy oraıda vedomstvo ókilderi bul jaǵymdy ózgerister qoǵamnyń belsendi azamattyq ustanym tanytýymen tikeleı baılanysty ekenin atap ótýde.
Belgili bolǵandaı, 2018 jyldyń 9 aıynda Ádep normalaryn buzǵandary úshin tártiptik jýapkershilikke 182 memlekettik qyzmetshi tartyldy. Bul turǵyda tártiptik jaýapkershilikke eń kóp tartylǵan memlekettik qyzmetshilerdiń sany óńirler boıynsha saralandy. «Almaty oblysynda - 32, Túrkistan oblysynda - 28, Mańǵystaý oblysynda - 18, Pavlodar oblysynda - 14, Shyǵys Qazaqstan oblysynda - 13, Aqmola oblysynda - 13, Jambyl oblysynda - 11 adamdy qurady.
Tártiptik jazaǵa tartylǵandardyń ishinde 16 memlekettik qyzmetshi atqaratyn memlekettik laýazymynan bosatyldy, ekeýiniń memlekettik laýazymy tómendetildi, 27-sine qyzmetke tolyq sáıkes emestigi týraly eskertý jasaldy.
Budan bólek, 42-sine qatań sógis, 54-ine sógis berildi, 41 memlekettik qyzmetshige eskertý jasaldy», - dep naqtylady Memlekettik qyzmet isteri jáne sybaılas jemqorlyqqa qarsy is-qımyl agenttiginiń aqparatynda.
