Qaı oblystarda sýbsıdııa alýǵa ótinim qabyldanyp jatyr

NUR-SULTAN. QazAqparat – Búgingi tańda sýbsıdııa alýǵa ótinim Almaty, Jambyl, Qostanaı jáne Túrkistan oblystarynda qabyldanyp jatyr. Bul týraly Ortalyq kommýnıkatsııalar qyzmetinde ótken kóktemgi egis jumystaryna daıyndyq týraly brıfıngide aıtyldy, dep habarlaıdy QazAqparat tilshisi.

«Jalpy, búginde aýyl sharýashylyǵy daqyldaryn sebý jumystary Almaty, Jambyl, Qyzylorda jáne Túrkistan oblystarynda júrgizilýde. Atap aıtqanda, 67,8 myń ga jazdyq dándi daqyldar, 6,5 myń ga kartop, 10,3 myń ga kókónis daqyldary, 18,8 myń ga kópjyldyq shóp egilgen. Egis naýqany barlyq qajetti resýrstarmen qamtamasyz etiledi. Búgingi kúni 2,4 mln tonna tuqym toltyryldy, bul - jospardyń 100,2%», - deıdi QR AShM ósimdik sharýashylyǵy ónimderin óndirý jáne qaıta óńdeý departamentiniń dırektory Azat Sultanov.

Onyń aıtýynsha, 2021 jyly tuqym sharýashylyǵyn qoldaýǵa 11,8 mıllıard teńge bólinip, 82,1 myń tonna elıtalyq tuqym men 3,8 mıllıon kóshet satyp alynady.

«Mıneraldy tyńaıtqysh satyp alýdy sýbsıdııalaýǵa oblystardyń jergilikti bıýdjetine 26,1 mıllıard teńge qarastyrylǵan. Oblystyq ákimdikterdiń jedel aqparatyna sáıkes, respýblıka agrarıılerine kóktemgi dala jumysyn júrgizý úshin 117,6 myń tonna mıneraldy tyńaıtqysh jetkizildi. Búgingi tańda sýbsıdııa alýǵa ótinim Almaty, Jambyl, Qostanaı jáne Túrkistan oblystarynda qabyldanyp jatyr. Jaqyn ýaqytta Batys Qazaqstan jáne Soltústik Qazaqstan oblystarynda ótinish qabyldaý bastalady. Basqa aımaqtarda sýbsıdııa tizimi men normalaryn bekitý sońǵy satyda. Premer-Mınıstr Úkimettiń búgingi otyrysynda standarttardy bekitýdi bir apta ishinde aıaqtaý týraly tıisti tapsyrma berdi», - deıdi ol.