Qaı oblystar men qalalar esirtki saýdasy boıynsha alda tur
Sotqa deıingi tergeýdiń biryńǵaı tiziliminde QR QK № 297-baby «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha 1,3 myń quqyqbuzýshylyq tirkeldi.
Óńirler boıynsha Almatyda eń kóp quqyq buzý faktisi tirkeldi: 184 jaǵdaı, byltyrǵy jylmen salystyrǵanda 53,3%-ke kóp. Osyndaı óńirlerdiń bestigine Astana qalasy (101 jaǵdaı, ótken jylmen salystyrǵanda 17,2%-ke az), Qostanaı (94 jaǵdaı, plıýs 38,2%), Jambyl (81 jaǵdaı, mınýs 22,9%) jáne Soltústik Qazaqstan oblystary (78 jaǵdaı, plıýs 5,4%) kiredi.
Mundaı qylmystyq quqyqbuzýshylyq Túrkistan jáne Ulytaý oblystarynda az tirkeldi: árqaısynda 19 jaǵdaı ǵana.
Bıyl segiz aı ishinde esirtkige mas nemese toksıkomanııa kúıinde 413 adam quqyq buzǵan. Ótken jylmen salystyrǵanda 16,9%-ke az.
Osyndaı kúıde qylmys jasaǵan adamdar ásirese Batys Qazaqstan oblysynda kóp ustalǵan: 59 adam, bir jyl buryn 91 bolǵan. Úshtik qatarynda Aqmola (47 adam) jáne Aqtóbe (45 adam) oblystary bar. Eń tómengi kórsetkish Qostanaı oblysynda tirkeldi: 3 adam ǵana. Bir jyl buryn da solaı bolǵan.
Esirtki satý jáne osyǵan uqsas qylmystar boıynsha kósh bastap turǵan Almatynyń ózinde esirtkige mas nemese toksıkomanııa kúıinde quqyq buzǵan 16 adam ustaldy, byltyr 9 adam tirkelgen edi.
Esirtkige mas kúıde tártip buzǵandardyń 63,7%-i, ıaǵnı 263 adam (byltyrǵy kórsetkishten 16%-ke az) esirtki quraldaryn zańsyz paıdalaný kezinde ustaldy. Olardyń maqsaty satý bolmaǵan.
Odan keıingi orynda júrgizýshi kýáliginen aıyrylǵan adamnyń kólik aıdaýy (50 adam) jáne esirtkini satý maqsatynda zańsyz daıyndaý jáne saqtaý (46 adam) qylmystary tur.
Esirtkige mas nemese toksıkomanııa kúıinde quqyq buzǵan adamdardyń tek ekeýi (byltyr bireý boldy) kámeletke tolmaǵan. Eki jasóspirim de esirtki paıdalanyp jatqan kezinde ustaldy.
