Qaı oblysta jol jóndeý jobalary kóp
ASTANA. KAZINFORM — Kólik mınıstri Marat Qarabaev jergilikti mańyzy bar joldardy jóndeý jumystarynyń basym bóligi qaı óńirlerde júrgiziletinin aıtyp berdi.
«Jergilikti mańyzy bar joldardy jóndeý jumystarynyń basym bóligi Qostanaı, Shyǵys Qazaqstan, Aqtóbe, Pavlodar jáne Soltústik Qazaqstan oblystarynda júzege asyrylady. Atap aıtqanda, Qostanaı oblysynda 823 km jol, elimizdiń shyǵys aımaǵynda — 383 km, Aqtóbe oblysynda — 381 km, Pavlodar jáne Soltústik Qazaqstan oblystarynda sáıkesinshe 358 km jáne 283 km joldy jóndeý josparda bar», — dedi mınıstr.
Marat Qarabaev jol jóndeý jumystary kólik ınfraqurylymyn jaqsartýǵa jáne jergilikti mańyzy bar joldardyń sapasyn arttyrýǵa baǵyttalǵanyn atap ótti.
Óz kezeginde bul sharalar eldi mekender arasyndaǵy kólik qatynasyn jaqsartýǵa yqpal etpek.
Qurylys barysynda joldardyń beriktigin arttyrý úshin ozyq tehnologııalar men materıaldar qoldanylyp jatqanyn atap ótken jón.
Avtomobıl joldary komıtetiniń aqparaty boıynsha, jóndeý jumystary joǵary sapany qamtamasyz etetin zamanaýı standarttarǵa sáıkes júrgizilip jatyr.
