Qaı mınıstrlikter bıýdjet qarajatyn ıgermedi

NUR-SULTAN. QazAqparat – Osy jyldyń 8 aıynda memlekettik bıýdjet túsimi 102,8 paıyz oryndaldy. Degenmen, ıgerilmeı qalyp qoıǵan soma da az emes - 74 mlrd teńge. Bul týraly búgin Úkimet otyrysynda QR Premer-Mınıstriniń birinshi orynbasary – Qarjy mınıstri Álıhan Smaıylov aıtty, dep habarlaıdy QazAqparat tilshisi.

Onyń dereginshe, osy jyldyń 8 aıynda memlekettik bıýdjet túsimi 102,8 paıyz oryndaldy nemese bıýdjetke 8 trln 407 mlrd teńge qarajat jınaldy. Onyń ósý qarqyny 116,8 paıyzdy qurady. Memlekettik bıýdjettiń shyǵyndary esepti kezeńde 8 trln 910 mlrd teńgege atqaryldy. Atalǵan qarajattyń jartysynan astamy nemese 4 trln 856 mlrd teńgesi áleýmettik salaǵa jiberildi. Bıýdjet tapshylyǵy - 503 mlrd teńge nemese JІÓ-ge shaqqanda 0,7 paıyz deńgeıinde qalyptasty.

«Kiris boıynsha esepti kezeńniń jospary bıýdjetterdiń barlyq deńgeılerinde artyǵymen oryndaldy. Memlekettik bıýdjet kirisi ótken jyldyń osyǵan uqsas kezeńimen salystyrǵanda 114,6 paıyz ósti. Respýblıkalyq bıýdjetke 4 trln 363 mlrd teńge kiris tústi. 2018 jyldyń 8 aıymen salystyrǵanda kiris 118,1 paıyz ósti nemese 669 mlrd teńgege kóp. Ol negizinen salyq esebinen qalyptasty. Salyqtyń ósýine salyqtyq-kedendik ákimshilendirýdiń jaqsarýy jáne ekonomıkanyń ósýi sebep boldy»,- dedi ol.
Mınıstrdiń aıtýynsha, jergilikti bıýdjetterdiń óz kirisi 1 trln 659 mlrd teńgege atqaryldy. Jospardan tys 134 mlrd teńge tústi.
«Memlekettik bıýdjettiń shyǵyndary - 98,3, respýblıkalyq bıýdjet – 98,9 jáne jergilikti 98 paıyzǵa atqaryldy. Respýblıkalyq bıýdjettiń shyǵyndary 7 trln 725 mlrd teńgeni qurady. 89 mlrd teńge atqarylmady. Onyń ishinde bıýdjet qarajatynyń únemdelýi – 15 mlrd teńge. Igerilmegen soma – 74 mlrd teńge. Eń kóp ıgerilmegen soma myna mekemelerde qalyptasty: Іshki ister mınıstrligi – 11 mlrd teńge; Qorǵanys mınıstrligi – 10,3 mlrd teńge; Ekologııa, geologııa jáne tabıǵı resýrstar – 10 mlrd teńge; Mádenıet jáne sport mınıstrligi – 6,7 mlrd teńge», - dedi Á.Smaıylov