Qaı memleket Qazaqstan arqyly gaz eksporttap otyr
Elimizde jumys istep turǵan eksporttyq gaz qubyry bar. Ol — Qazaqstan-Qytaı gaz qubyry. Bul týraly Energetıka mınıstri Almasadam Sátqalıev Almatyda ótken brıfıngte aıtty, dep habarlaıdy Kazinform.
Mınıstrdiń sózinshe, búgingi kúni Shyǵys Qazaqstan oblysynda oqshaýlanǵan gaz ken orny jumys istep tur. Zaısan aýdanyndaǵy buryn QHR-ǵa gaz eksporttaǵan Sarybulaq gaz ken orny búgingi kúni oblys halqyn ǵana gazben qamtıdy.
«Bul gaz ken orny ázirge Qazaqstannyń biryńǵaı gaz tasymaldaý júıesine qosylmaǵan. Buǵan deıin onyń ıeleri gazdy QHR-ǵa eksporttaǵan bolatyn. Keıin osynda óndiriletin kógildir otynnyń kólemi azaıǵan kezde QHR-ǵa gaz eksportyna tolyq tyıym salý jóninde sheshim qabyldandy. Sondaı-aq tıisti tehnıkalyq sharalar jasaldy. Búgingi kúni atalǵan gaz ken ornyndaǵy búkil gaz ShQO tutynýshylaryna jetkizilip otyr», — dedi Almasadam Sátqalıev.
Mınıstr osy gaz ken ornynyń ınfraqurylymnyń tehnıkalyq jaǵdaıynda problemalar bar ekenin atap ótti.
Osyǵan oraı mınıstrliktiń komıssııasy birneshe ret shyǵyp, gaz qubyryn paıdalanatyn kompanııaǵa eskertý jasaǵan jáne atalǵan másele qazir baqylaýda.
«Bizde jumys istep turǵan eksporttyq gaz qubyry bar. Ol — Qazaqstan-Qytaı gaz qubyry. Sonymen birge Qazaqstan aýmaǵy arqyly QHR-ǵa túrikmen gazy jetkiziledi. Buryn ózbek gazynyń tranzıti bolǵan edi. Búgingi kúni bizdiń eksport qubyrlarymyz arqyly osyndaı tasymal júzege asyp jatyr», — dedi Energetıka mınıstri Almasadam Sátqalıev.
