Qaı halyqtyń smartfonǵa degen táýeldiligi basym
ASTANA. QazAqparat - Bul suraqqa jaýap berý maqsatynda Tefficient atty Shvetsııalyq telefon operatory Eýropa men Azııa elderinen quralǵan 32 memleket halqyna tájirıbe jasaǵan. Saýalnamanyń nátıjesinde Fınlıandııa eliniń turǵyndary ózge halyqtarǵa qaraǵanda áldeqaıda uıaly telefonǵa táýeldi, basybaıly bolyp shyqqan, dep jazady Massaget.kz.
Buǵan tań qalýǵa da bolmas, sirá. Óıtkeni smartfondarǵa, uıaly telefondarǵa, elektronıkaǵa basybaıly adamdar osy ónimdi shyǵarýmen aınalysatyn memleketterde kóp bolatyny belgili jaıt qoı. Al Fınlıandııada Maıkrosoft satyp alǵan, 2017 jyly jańa úlgilerin óndiriske shyǵaratyn Nokia markaly uıaly telefonnyń daıyndalatynyn bilemiz.
Degenmen de, Fınlıandııa turǵyndarynyń uıaly telefonǵa degen qyzyǵýshylyǵynyń joǵary bolý sebebi - tıimdi operatorlyq tarıfterdiń bolýy. Ǵalamtorǵa degen jeńil qol jetimdilik, tarıftik jospar baǵalarynyń arzan bolýy uıaly telefonǵa degen suranysty birden arttyratyny tájirıbe júzinde dáleldendi.
Qyzyq bolsa da aıta otyraıyq, fın halqynyń uıaly telefondy qoldaný jıiligi elektronıka qoǵamynda ómir súrip jatqan káristerden eki esege artyp ketken. Melanholık fınndardyń ınternetke degen mundaı shekten tys táýeldiligi Helsınkı densaýlyq saqtaý departamentin alańdatyp otyr. Óıtkeni, ınternetke, uıaly telefonǵa degen táýeldilik kóptegen áleýmettik-psıhologııalyq problemalardyń bastaýyna aınaladyp. Ata-analar balalaryna az kóńil bóletin boldy. Adamdar arasyndaǵy shynaıy qarym-qatynas buzylyp, qoǵam músheleri arasynda depressııa derti dendep barady.
Fınlıandııada buǵan qatysty áleýmettik rolık te túsirilgen. Rolıktiń sıýjeti boıynsha jaǵajaıda uıaly telefonmen áýre bolyp otyrǵan ana qarǵalardyń balasyn qalaı kóterip áketip bara jatqandyǵyn baıqamaı qalady. Alaıda bul áleýmettik jarnama Fınlıandııa turǵyndaryna asa unaı qoımaǵan. Memleket bıligi joldap otyrǵan «Nemquraılylyq - qoǵam derti» atty slogan da Fınlıandııa halqyna oı sala almady. Qazirgi ýaqytta Fınlıandııada 5,5 mıllıon adam turady. Buǵan qaramastan, belsendi tarıftik jospar sany 11 mıllıondy quraǵan.
Ortasha eseppen, eldiń árbir turǵyny eki tarıftik jospardy tutynatyn bolyp otyr. Eldegi tarıftik jospardyń kólemi shektelmegen. ıAǵnı, erkin ınternet-trafıgi qurylǵan. Alaıda mundaı trafıktik usynys el halqy úshin barlyq jaǵynan tıimdi me?!
