Qaı eldiń týrısteri Qazaqstanda uzaq saıahattaıdy
ASTANA. QazAqparat – Aqsh, Germanııa, Ońtústik Koreıa jáne Úndistan týrısteri Qazaqstanda orta eseppen 4 kún ótkizedi, dep habarlaıdy QazAqparat Mádenıet jáne sport mınıstrligine silteme jasap.
eQonaq aqparattyq júıesiniń deregi boıynsha týrıstik maqsatpen kelgen AQSh, Germanııa, Ońtústik Koreıa jáne Úndistan azamattary Qazaqstanda orta eseppen 4 kún ótkizedi.
Elimizde aıaldaý merzimi boıynsha Ózbekstan azamattary kósh bastap tur. Kórshi eldiń týrısteri Qazaqstanda 10 kúnge deıin toqtaıdy.
Al, Reseılik týrıster 6 kún, Belarýs azamattary 5 kún, Germanııa týrısteri 4 kún bolsa, Qytaı azamattary elimizde 3,5 kún ótkizedi.
«eQonaq júıesi – elimizge kelgen týrıster aǵynyn baqylaý jáne taldaý, ornalastyrý oryndarynyń tizilimin qurý jáne t.b. birneshe mańyzdy fýnktsııany oryndaıdy. Basty maqsat – týrısterge kórsetiletin qyzmetterdiń ashyqtyǵy men sapasyn arttyrý. Júıege 3 214 ornalasý qyzmetin usynatyn kásipkerlik nysany tirkelgen», - deıdi Mádenıet jáne sport mınıstrliginiń baspasóz hatshysy Móldir Ábdýalıeva.
