Qaı elderden kelgen qazaqstandyqtar karantınge jatqyzylady

NUR-SULTAN. QazAqparat - QR Bas memlekettik sanıtar dárigeri Jandarbek Bekshın koronavırýs boıynsha asa qaýipti memleketter tizimin jarııalady, dep habarlaıdy QazAqparat tilshisi.

Bul tizimdegi memleketterden kelgen qazaqstandyqtar úı karantınine oqshaýlanady.

«Qaýpi jaǵynan birinshi sanatqa Qytaı, Ońtústik Koreıa, Japonııa, Italııa, Iran, Gonkong, Makao, Taıvan enip otyr. Ekinshi sanatta úsh memleket bar - Sıngapýr, Taıland, Malaızııa. Úshinshi sanatqa - Vetnam, Germanııa, Aýstralııa, AQSh, Birikken Arab ámirlikteri, Kanada, Ulybrıtanııa men Frantsııa engizildi», - dedi bas sanıtar Ortalyq kommýnıkatsııalar qyzmetinde ótken baspasóz máslıhatynda.

Birinshi sanattaǵy elderden kelgen azamattar 1 naýryzdan bastap úıde karantınge oqshaýlanady. Kúndelikti jergilikti dárigerler osy azamattardy qarap shyǵyp, naqty tapsyrma beretin bolady.

«Bul olardyń aýrý ekenin bildirmeıdi. Biz aldyn alý sharalaryn jasap jatyrmyz. Azamattar ózderi elge kelgen soń oqshaýlanýy tıis. Olarǵa jaqsy jeldenetin bólek bólme berý kerek, úıge qonaq shaqyrýǵa, qoǵamdyq oryndarǵa barýǵa, qoǵamdyq kólik paıdalanýǵa da shekteý qoıyp jatyrmyz», - dedi J. Bekshın.