Qaı elder Pýtın men Zelenskııdiń kezdesýin uıymdastyrýdy usyndy

ASTANA. KAZINFORM — Belarýs beıbitshilikti qamtamasyz etý úshin qajet bolsa Reseı prezıdenti Vladımır Pýtın men Vladımır Zelenskııdiń kezdesýin uıymdastyrýǵa daıyn, dep habarlaıdy Kazinform. 

Bul týraly Belarýs prezıdentiniń baspasóz hatshysy Aleksandr Lýkashenko Natalıa Eısmont málimdedi.

— Belarýs deldal rólin suraǵan joq jáne surap jatqan joq, biraq bizdiń baýyrlas respýblıkamyzda tynyshtyq úshin qajet bolsa, biz kez kelgen kezdesýdi uıymdastyrýǵa daıynbyz. Barlyǵyn joǵary deńgeıde ótkizemiz. Biraq Belarýs prezıdenti bul taqyrypty amerıkalyq áriptesimen talqylaǵan joq, — dedi ol.

Buǵan deıin de osyndaı bastamalardy birqatar elder aıtqan bolatyn. Zelenskıı men Pýtınniń kezdesýin ótkizýdi Shveıtsarııa, Italııa, Aýstrııa jáne Majarstan usyndy.

Aq úıdiń baspasóz hatshysy Kerolaın Lıvıttiń málimdeýinshe, AQSh qazir Reseı jáne Ýkraınamen Pýtın men Zelenskııdiń yqtımal kezdesýin ótkizý ornynyń nusqalaryn talqylap jatyr. 

— Qazir bizdiń ulttyq qaýipsizdik toby eki tarappen de talqylap jatqan túrli nusqalar bar, — dedi ol tilshilerge arnalǵan kezekti brıfıngte.

Lıvıtt sonymen qatar Pýtın men Zelenskııdiń kezdesýin daıyndaýǵa vıtse-prezıdent Djeı Dı Vens, Memlekettik hatshy Marko Rýbıo jáne Amerıka kóshbasshysynyń arnaıy ókili Stıven Ýıtkoff jaýapty bolatynyn aıtty.

— Prezıdent Tramp prezıdent Pýtınmen telefon arqyly sóılesti jáne ol beıbit protsestiń kelesi kezeńine — prezıdent Zelenskıımen kezdesýdi uıymdastyrýǵa, qajet bolǵan jaǵdaıda prezıdentter Pýtın, Zelenskıı jáne Tramptyń úshjaqty kezdesýin uıymdastyrýǵa kelisti, — dedi ol.

18 tamyzda Donald Tramp Vashıngtonda Vladımır Zelenskıı jáne eýropalyq kóshbasshylarmen kezdesti. Keıin Aq úı basshysy Vladımır Pýtınge telefon soqty.

Kelissózden keıin Tramp Reseı men Ýkraına prezıdentteriniń kezdesýin jarııalady. 
Tramp, Zelenskıı men Eýropa kóshbasshylarynyń Aq úıdegi kezdesýi qalaı ótkenin myna materıaldan oqı alasyz.