Qaı aýrý túrleri boıynsha áskerge shaqyrylǵandar bosatylady
Azamattardy merzimdi áskerı qyzmetke shaqyrýdan bosatýǵa jatatyn aýrýlardyń tizbesi «Qazaqstan Respýblıkasynyń Qarýly Kúshterinde, basqa da áskerleri men áskerı qurylymdarynda qyzmet ótkerý úshin adamdar densaýlyq jaǵdaıyna qoıylatyn talaptardy bekitý týraly» Qorǵanys mınıstriniń 2020 jylǵy 22 jeltoqsandaǵy № 722 buıryǵymen bekitilgen.
«Bul turǵyda adamdar ishki aǵza aýrýlary, hırýrgııalyq patologııa, nevrologııa, kóz aýrýy jáne basqa da dertke qatysty merzimdi áskerı qyzmetke shaqyrýdan bosatylady», - delingen Qorǵanys mınıstrliginiń «QazAqparat» agenttigine bergen jaýabynda.
Atap aıtqanda, Qorǵanys mınıstrligi qaı sanattaǵy adamdar áskerı qyzmetten bosatylýy múmkin ekenin jáne ásker qataryna shaqyrylmaıtynyn túsindirdi.
Qoldanystaǵy zańnamaǵa sáıkes, merzimdi áskerı qyzmetke shaqyrý boıynsha merzimin keıinge qaldyrý nemese bosatý sheshimi áskerge shaqyrý komıssııasynyń quzyretinde.
Bul turǵyda keıinge qaldyrý otbasy ári densaýlyq jaǵdaıyna, oqýyn jalǵastyrǵandarǵa, kásibı qyzmetin atqaryp júrgen pedagogterge, aýyldaǵy dárigerlerge, Parlamenttiń nemese jergilikti ókildi organdardyń depýtattaryna qatysty bolady.
Sonymen qatar, aldyn ala tergeý amaldaryna tartylǵan nemese qylmystyq isin sot qarap jatqan adamdar jaýyngerlik jıyndarǵa shaqyrtylmaıdy.
Budan bólek, azamattyq áýe kemeleriniń ushý ekıpajynyń múshelerine, tıisti bilimi bar azamattyq avıatsııa ınjenerleri, mehanıkteri jáne tehnıkterine, sondaı-aq quqyq qorǵaý organdarynyń bilim berý uıymdarynda alǵashqy kásiptik daıarlyqtan ótip jatqandarǵa qatysty áskerge shaqyrýdy keıinge qaldyrý tártibi qarastyrylǵan.
