Kavkaz musylmandary basqarmasynyń tóraǵasy Álemdik dinder sezi ınstıtýtyn qoldaıdy

BAKÝ. QazAqparat – Qazaqstan Respýblıkasynyń Ázerbaıjandaǵy Elshisi Álim Baıel Kavkaz musylmandary basqarmasynyń tóraǵasy Sheıh-ýl-Islam Allahshúkúr Pashazademen kezdesti, dep habarlaıdy QazAqparat menshikti tilshisi.

Suhbat barysynda dinaralyq yntymaqtastyqtyń ózekti máseleleri jáne álem dinderi men mádenıetteri arasyndaǵy dıalogty odan ary jalǵastyrý jóninde pikir almasyldy. Atap aıtqanda, taraptar BUU Bas Assambleıasy qabyldaǵan dinı qundylyqtarǵa kez kelgen shabýyldy aıyptaıtyn rezolıýtsııanyń ózektiligin atap ótti.

Allahshúkúr Pashazade Qazaqstannyń konfessııaaralyq dıalogty damytýǵa jáne nyǵaıtýǵa qosyp jatqan úlesin joǵary baǵalaıtynyn, sondaı-aq Álemdik jáne dástúrli dinder lıderleri sezi men onyń Hatshylyǵy aıasynda ótkiziletin dinı jáne qoǵam qaıratkerleri kezdesýleriniń mańyzdylyǵy men tıimdiligin atap ótti. Bul rette ol osy jyldyń kúzinde ótetin sez Hatshylyǵynyń otyrysyna qatysatynyn rastady.

Óz tarapynan Álim Baıel Sheıhke Astanadaǵy Álemdik jáne dástúrli dinder lıderleriniń sezderine turaqty qatysyp júrgeni jáne osy ınstıtýtty odan ári damytýǵa baǵyttalǵan usynystary úshin alǵysyn bildirdi. Sonymen birge Elshi Sheıhke jýyrda ótken «Ortalyq Azııa + Shyǵanaqtaǵy arab memleketteri yntymaqtastyǵy keńesiniń» birinshi sammıti týraly aqparat berip, ıslam áleminde birigý men damý protsesteriniń kúsheıýine degen úmitin bildirdi.

Avtor: Serikbol Qoshmaǵanbetov