Kavasakıge uqsas sındromǵa shaldyqqan balalar emdelip shyqty

NUR-SULTAN. QazAqparat – QR Densaýlyq saqtaý vıtse-mınıstri Ajar Ǵınııat Kavasakıge uqsas sındromǵa shaldyqqan balalar týraly aıtyp berdi, dep habarlaıdy QazAqparat tilshisi.

«2020 jylǵy tamyzdan bastap respýblıkada COVID–19 indetimen astasqan mýltıjúıelik qabyný sındromy (Kavasakıge uqsas sındrom) jaǵdaılary tirkele bastady. Aýrý ýshyqqan jaz aılarynan keıin balalar arasynda atalǵan indet anyqtaldy. Úsh aptadan beri balalar arasynda bul aýrý tirkelmedi», - dedi vıtse-mınıstr Ortalyq kommýnıkatsııalar qyzmetinde.

Onyń sózine qaraǵanda, bıyl mýltıjúıelik qabyný sındromy bar 42 bala tirkelgen, qazirgi ýaqytta mundaı dıagnozy bar patsıentter joq.

«Balalar statsıonarlardan emdelip shyqty», - dedi Ajar Ǵınııat.

Budan buryn habarlanǵandaı, bıyl elimizde COVID-19 dıagnozy rastalǵan barlyǵy 3 164 bala tirkelgen, onyń ishinde 114 jańa týǵan náreste bar. Qazirgi kezde COVID-19 indeti bar 340 bala baqylaýda tur.