Qaýiptiń «sary» deńgeıi: Ystanbulǵa baǵyt alǵan 40-tan astam ushaq basqa áýejaılarǵa jiberildi
ASTANA. KAZINFORM — Aýa raıynyń qolaısyzdyǵyna baılanysty Ystanbul halyqaralyq áýejaıyna baǵyt alǵan 40-tan astam ushaq basqa áýejaılarǵa qonýǵa májbúr boldy. Bul týraly Túrkııanyń Kólik jáne ınfraqurylym mınıstrligi málimdedi, dep habarlaıdy Report.
Vedomstvonyń dereginshe, 16 reıs Ankara áýejaıyna, 10 reıs Izmır áýejaıyna, al taǵy 8 reıs Ystanbuldyń Azııa bóliginde ornalasqan Sabıha Gókchen áýejaıyna baǵyttalǵan. Bul áýejaıdy negizinen arzan áýe tasymaldaýshylar paıdalanady.
14 qazanda Ystanbulda nóser jańbyr jaýyp, qatty jel soǵýy saldarynan qalanyń keıbir aýdandarynda kólik qatynasy qıyndady. Resmı málimet boıynsha 1 277 turǵyn úıdi sý basyp, 15 jerde kóshkin júrgen.
Nóserden keıin Ystanbuldyń kóptegen aýdanyndaǵy joldardy sý basyp, keı jerlerdegi jerasty ótkelderi sý astynda qaldy. Qarbalas ýaqytta tasjoldardaǵy kólik qozǵalysynyń tyǵyzdyǵy 89 paıyzǵa jetti.
14 qazan keshindegi málimet boıynsha Ystanbuldyń Fatıh aýdanyndaǵy sý jınalǵan jerlerdiń birinde 14 jastaǵy jasóspirim toq soǵý saldarynan kóz jumǵan.
Qala bıligi 15 qazanǵa meteorologııalyq qaýiptiń sary deńgeıin jarııalady. Boljam boıynsha nóser jańbyr kúnniń sońyna deıin jalǵasady. Sondaı-aq sý basý, sel júrý, kólik qatynasy men ınfraqurylym jumysynyń buzylý qaýpi bar.
Bılik turǵyndar men týrısterdi asa qajettilik bolmasa, úıden shyqpaýǵa shaqyrdy. Ystanbuldaǵy jergilikti mektepterde sabaq toqtatylyp, memlekettik qyzmetkerlerdiń keıbir sanattaryna demalys berildi.
Aıta keteıik, bıyl jazdyń sońǵy kúnderi Ystanbul áýejaıy jolaýshy tasymaly boıynsha kósh bastap, rekord ornatqan bolatyn.
