Qaýipti jerde jumys isteıtin qazaqstandyqtardyń 15,4 paıyzy Qaraǵandy oblysynda shoǵyrlanǵan

Keıingi eki jylda zııandy jáne qaýipti eńbek jaǵdaıynda jumys isteıtin qazaqstandyqtardyń sany 5 paıyz artqan, dep habarlaıdy Kazinform.

23 qazanǵa deıin Ashyq NQA portalynda 2030 jylǵa deıingi Qaýipsiz eńbek tujyrymdamasy qoǵam talqysynda bolǵan edi.

Osy qujattaǵy derekterge súıensek, 2022 jyly zııandy jáne qaýipti eńbek jaǵdaıynda jumys isteıtin adam sany 2020 jylmen salystyrǵanda 5% artyp, 386,3 myńnan asqan.

Bul kórsetkish ásirese óńdeý ónerkásibinde (26,9%), taý-ken óndirisinde (24,5%), kólik jáne qoıma salasynda (14,1%) jıi tirkelgen.

Óńirler arasynda Qaraǵandy (15,4%), Pavlodar (10,5%) jáne Mańǵystaý oblystary (10,0%) alǵashqy úshtikte tur.

Resmı statıstıka boıynsha, 2022 jyldyń qorytyndysynda qyzmetine baılanysty jazataıym oqıǵa kezinde zardap shekkenderdiń jıilik koeffıtsıenti 1000 jumyskerge shaqqanda 0,44 zardap shegýshiden kelgen.

Al jazataıym oqıǵadan qaza tapqandar jıiliginiń koeffıtsıenti 1000 jumyskerge shaqqanda 0,037 bolǵan. ıAǵnı, byltyr eldegi árbir 1 mln jumyskerdiń ishinde 37 adam jumys istep júrip qaza tapqan.

Salalardyń ishinde óndiristik jaraqattyń neǵurlym joǵary deńgeıi de (1000 adamǵa 1,9) qaza tapqandardyń jıilik koeffıtsıenti de (0,12) taý-ken salasynda tirkelgen.

Odan keıingi orynda — óńdeý ónerkásibi (tıisinshe 1,2 jáne 0,07).

Qaraǵandy oblysy óndiris kezindegi oqys oqıǵalardan adam eń kóp zardap shegetin óńirlerdiń de kóshin bastap tur (jazataıym oqıǵalardan zardap shekkenderdiń jıilik koeffıtsıenti — 1,2; jazataıym oqıǵalardan qaza tapqandardyń jıilik koeffıtsıenti — 0,09).

Odan keıingi oryndarǵa Ulytaý (tıisinshe 4,3 jáne 0,03) men Shyǵys Qazaqstan oblysy (tıisinshe 1,0 jáne 0,04) jaıǵasqan.

2022 jyldyń qorytyndysy boıynsha Qazaqstanda jasyryn jaraqattaný kórsetkishi 11:1 boldy, ıaǵnı ár 11 jaraqattaný faktisiniń bireýi jasyryn qalady degen sóz.

Bul álemniń damyǵan elderiniń kórsetkishimen salystyrǵanda óte joǵary.

Mysaly, bul kórsetkish Fınlıandııada 5750:1, Germanııada — 1811:1, Italııada — 548:1 jáne Japonııada — 177:1.

Eldegi jasyryn jaraqattanýdyń eń úlken kórsetkishi qurylys (4:1) jáne aýyl sharýashylyǵy (4:1) salalarynda tirkelgen.

«Bul eńbekti qorǵaýdy basqarý júıesin uıymdastyrýdyń tómen deńgeıimen túsindiriledi», — delingen tujyrymdamada.

Al taý-ken óndirisinde bul kórsetkish — 21:1.