Arnaıy tólem: kim jumystan shyǵyp, zeınetke shyqqanǵa deıin aqsha ala alady
ASTANA. KAZINFORM — 2025 jylǵy 1 shildedegi jaǵdaı boıynsha 3 916 azamatqa zııandy eńbek jaǵdaılarynda uzaq ýaqyt jumys istegen adamdarǵa arnalǵan arnaýly áleýmettik tólem taǵaıyndaldy. Atalǵan tólemdi taǵaıyndaýǵa jalpy 3 968 adam ótinish bildirgen.
Eki kózden tólenetin arnaýly áleýmettik tólemge (respýblıkalyq bıýdjet jáne Biryńǵaı jınaqtaýshy zeınetaqy qory) 313 adam júgindi, onyń ishinde 309 adamǵa taǵaıyndaldy.
Tórt qarjylandyrý kózinen beriletin AÁT (respýblıkalyq bıýdjet, Biryńǵaı jınaqtaýshy zeınetaqy qory, jumys berýshi jáne ómirdi saqtandyrý uıymy) taǵaıyndaýǵa 3 655 adam ótinish bildirip, onyń 3 607-ine taǵaıyndalǵan.
— 56 azamat saqtandyrý kompanııasymen zeınetkerlik annýıtet shartynyń jasalýyn kútýde, 34 azamat SMS habarlamaǵa jaýap bermegen. Mindetti sharttardy oryndamaǵandyqtan, 18 ótinish berýshige AÁT taǵaıyndaýdan bas tartyldy.
Óńirler boıynsha arnaýly áleýmettik tólemderdi alýǵa ótinish bildirgenderdiń eń kóp sany Qaraǵandy (2 kózden — 43 adam, 4 kózden — 496 adam), Shyǵys Qazaqstan (2 kózden — 32 adam, al 4 kózden — 356 adam) jáne Qostanaı (2 kózden — 9 adam, al 4 kózden — 297 adam) oblystarynda tirkelgen, — delingen Eńbekmeni habarlamasynda.
Buryn habarlanǵandaı 2024 jyldyń 1 qańtarynan bastap Qazaqstanda zııandy eńbek jaǵdaılarynda uzaq ýaqyt jumys istegen adamdarǵa arnaýly áleýmettik tólem engizildi.
— Arnaýly áleýmettik tólem taǵaıyndaý úshin 55 jasqa tolý jáne Biryńǵaı jınaqtaýshy zeınetaqy qorynda keminde 7 jyl kásiptik zeınetaqy aýdarymdarynyń bolýy mindetti sharttar bolyp tabylady. Tólem zeınetkerlik jasqa deıin tólenedi. Arnaýly áleýmettik tólemderdi alý úshin eńbek jaǵdaılary zııandy jumystarmen aınalyspaýǵa tıis. Jumyskerler jeńil jumysqa aýysa alady, sodan keıin olar jalaqy men tólem alady nemese demalysqa shyǵyp, zeınetke shyqqanǵa deıin arnaýly áleýmettik tólem alady, — delingen mınıstrlik habarlamasynda.
Áleýmettik kodekske sáıkes jumys berýshiler kásipteri men qyzmet túrleri Eńbek jaǵdaılary zııandy jumystarmen aınalysatyn jumyskerlerdiń, óndiristerdiń, jumystardyń, kásipterdiń tizbesine engizilgen jumyskerler úshin mindetti kásiptik zeınetaqy jarnalaryn aýdarady, olardyń 2,3 myńnan astam pozıtsııasy bar. Osylaısha, arnaýly áleýmettik tólemdi ekonomıkanyń 17 salasynda, onyń ishinde taý-ken óndirý jáne óńdeý ónerkásibinde jáne ózge de salalarda jumys isteıtin qazaqstandyqtar ala alady.
Aıta ketelik endi zeınetaqy avtomatty túrde taǵaıyndalmaq.