Qaýipti vırýspen zalaldanǵan qyzanaq tuqymdary Astana áýejaıynan ótkizilmek boldy

ASTANA. KAZINFORM — Astana áýejaıynda karantındik zııankespen zalaldanǵan ónimdi ákelý faktisi anyqtaldy, dep habarlaıdy Aýyl sharýashylyǵy mınıstrliginiń baspasóz qyzmeti.

Astana qalasynyń halyqaralyq áýejaıyndaǵy fıtosanıtarııalyq baqylaý beketinde karantındik fıtosanıtarııalyq baqylaý jáne qadaǵalaý júrgizý barysynda ulttyq zańnama talaptaryn buza otyryp, karantınge jatqyzylatyn ónimdi ákelý faktisi anyqtaldy.

— Baqylaý barysynda Koreıa Respýblıkasynan ákelingen, shyǵý tegi úndistandyq qyzanaq tuqymdarynyń partııasy anyqtaldy. Fıtosanıtarııalyq is-sharalar nátıjesinde atalǵan ónimniń karantındik nysan — qyzanaq jemisteriniń qońyr ájimdilik vırýsymen (Tomato brown rugose fruit virus) zalaldanǵany belgili boldy. Atalǵan vırýs aýyl sharýashylyǵy óndirisine, ásirese kókónis sharýashylyǵyna eleýli zııan keltirýi múmkin asa qaýipti karantındik nysandar qataryna jatady jáne eldiń fıtosanıtarııalyq qaýipsizdigine aıtarlyqtaı qater tóndiredi.Karantınge jatqyzylatyn ónimniń ıesine qatysty ákimshilik is qozǵaldy. Іs materıaldary protsessýaldyq sheshim qabyldaý úshin sotqa joldandy, — delingen mınıstrlik taratqan aqparatta.

Qazaqstan Respýblıkasy Aýyl sharýashylyǵy mınıstrligi syrtqy ekonomıkalyq qyzmetke qatysýshylarǵa karantınge jatqyzylatyn ónimdi Qazaqstan aýmaǵyna ákelý kezinde karantındik fıtosanıtarııalyq zańnama talaptaryn qatań saqtaý qajettigin eske salady.

Budan buryn SQO álemniń 30 eline karantınge jatqyzylatyn ónimdi eksporttaıtynyn jazdyq.