Qaýipti tájirıbe: Almatydaǵy aýrýhanada 100-den astam qurylǵy tekserýsiz iske qosylǵan
ASTANA. KAZINFORM — Almaty qalasynda QR Saýda jáne ıntegratsııa mınıstrligi Tehnıkalyq retteý jáne metrologııa komıteti departamentiniń jospardan tys tekserýiniń qorytyndysy boıynsha «Ortalyq qalalyq klınıkalyq aýrýhana» ShJQ KMK qyzmetinde ólshem birligin qamtamasyz etý salasyndaǵy zańnamanyń óreskel buzýshylyqtary anyqtaldy. Bul týraly vedomstvonyń baspasóz qyzmeti málim etti.
Tekserý barysynda 2026 jylǵy 11 aqpanǵa deıin medıtsınalyq mekemede 106 patsıent monıtorıngi modýli mindetti rásimderden ótpeı paıdalanylǵany belgili boldy.
— Atalǵan jabdyqtar tıpin bekitýsiz nemese metrologııalyq attestatsııasyz qoldanylǵan, memlekettik reestrde tirkelmegen jáne mindetti tekserýden (poverkadan) ótpegen. Soǵan qaramastan, qurylǵylar medıtsınalyq kómek kórsetý barysynda paıdalanylǵan, — delingen habarlamada.
Bul modýlder patsıentterdiń ómirlik mańyzdy kórsetkishterin baqylaýǵa arnalǵan, atap aıtqanda: júrek soǵý jıiligi, arterııalyq qysym, qandaǵy ottegi deńgeıi (SpO₂), elektrokardıogramma (EKG) jáne dene temperatýrasy.
— Mundaı jabdyqty ólsheý dáldigi rastalmaı qoldaný klınıkalyq sheshim qabyldaýǵa tikeleı áser etip, patsıentterdiń qaýipsizdigine qaýip tóndiredi. Tekserý nátıjesinde medıtsınalyq uıym qyzmetinde Qazaqstan Respýblıkasynyń «Ólshem birligin qamtamasyz etý týraly» zańynyń 17 jáne 19-baptarynyń talaptary buzylǵany anyqtaldy, — dep habarlady vedomstvodan.
Anyqtalǵan faktiler tekserý materıaldarymen rastaldy. Baqylaý is-sharalarynyń qorytyndysy boıynsha anyqtalǵan buzýshylyqtardy joıý týraly oryndalýy mindetti nusqama berildi. Jabdyqtardy paıdalaný zań talaptaryna tolyq sáıkestikke keltirilýi tıis. Jiberilgen buzýshylyqtar úshin mekeme Qazaqstan Respýblıkasynyń Ákimshilik quqyq buzýshylyq týraly kodeksiniń 419-baby boıynsha ákimshilik jaýapkershilikke tartyldy.
Aıyppul mólsheri 600 AEK (2 595 000 teńge) bolyp, belgilengen tártipte tólendi. Departament metrologııalyq baqylaý talaptaryn saqtaý mindetti ekenin jáne onyń patsıentterdiń qaýipsizdigin qamtamasyz etýmen tikeleı baılanysty ekenin atap ótti. Belgilengen normalardan kez kelgen aýytqýǵa jol berilmeıdi.
Aıta keteıik, buǵan deıin Almatydaǵy kóterme bazarda 9 deldal anyqtalǵan edi.
