Qaýipti sátte qońyraý úzilmeıdi: SQO-da jedel járdem qyzmeti jańa fýnktsııa engizdi

PETROPAVL. KAZINFORM – Soltústik Qazaqstan oblystyq jedel medıtsınalyq járdem ortalyǵy kómektiń tıimdiligin arttyrý maqsatynda jumystaryna jańashyldyq engizdi. Ortalyqtyń málimetinshe, endi turǵyndardan shaqyrtý túsken kezde «qońyraýdy ustap turý» fýnktsııasy qoldanylady.

Bul – shuǵyl jaǵdaıda naýqasqa kómektesýdiń jańa tásili. Naýqastyń ómirine qaýip tóngen kezde dıspetcher qońyraýdy úzbeı, ony ustap turý rejımine aýysady, ıaǵnı tutqany qoımaıdy. Osylaısha, jedel medıtsınalyq kómek brıgadasy kelgenge deıin dıspetcher shaqyrýshyǵa qoldaý kórsetip, keńes beredi.

- Jańa júıeniń jumys isteý tártibi qarapaıym, naýqastyń jaǵdaıy aýyr dep baǵalansa, dıspetcher telefon tutqasyn qoımaı, shaqyrýshyǵa alǵashqy kómek kórsetý jóninde keńes beredi, mysaly, dem aldyrý, qan toqtatý, júrekke janama massaj jasaý tásilderi jáne t.b. jasaýǵa septesedi. Bul keńester jedel járdem jetkenge deıingi altyn ýaqytty tıimdi paıdalanýǵa múmkindik beredi. Búginge deıin bul rejım birneshe ret qoldanyldy. Nátıjesinde, brıgada kelgenge deıin naýqasqa durys kómek kórsetilip, adam ómirin saqtap qalýǵa yqpal etildi, - deıdi mamandar.

Ortalyq jumysyna jańashyldyqty engizbes buryn dıspetcherler arnaıy kýrstan ótken. Olar shuǵyl jaǵdaıda telefon arqyly kómek kórsetýdiń tártibi men tásilderin meńgerdi.

Buǵan deıin Jambyl oblysynda medıtsına qyzmetkerine til tıgizgen er adamǵa aıyppul salynǵanyn jazǵan edik.