Qaýipti óndirister qatań baqylaýda: 10 myńnan astam zańbuzýshylyq anyqtaldy
ASTANA. KAZINFORM – Elimizde ónerkásiptik qaýipsizdikti memlekettik baqylaý men qadaǵalaýdyń jańa mehanızmi engizildi, onda barlyq kásiporyndar tolyqtaı qamtylady. Bul týraly Tótenshe jaǵdaılar mınıstri Shyńǵys Árinov Úkimette baıandady.
Ótken jylmen salystyrǵanda, bıylǵy 5 aıda kásiporyndarǵa júrgizilgen tekserýler sany 2,5 esege artqan.
– Nátıjesinde 10 myńnan astam ónerkásiptik qaýipsizdik talaptarynyń buzýshylyǵy anyqtaldy. Ártúrli sanattaǵy 523 qyzmetker ákimshilik jaýapkershilikke tartyldy. Aıyppuldardyń jalpy somasy 6 mln teńgeden 62 mln teńgege deıin ulǵaıdy, – dedi Sh.Árinov.
Qyzmetkerlerdiń ómiri men densaýlyǵyna qaýip tóndiretin óreskel buzýshylyqtar anyqtalǵan 600-den astam nysan men tehnıkalyq qurylǵylardyń jumysy toqtatyldy.
– Alaıda jekelegen kásiporyndar engizilgen shekteýlerdi elemeı, tótenshe jaǵdaılardyń týyndaý qaýpin arttyryp, óz jumystaryn jalǵastyryp jatyr. Sol sebepti osyndaı jaýapsyz nysan ıelerine qatysty qosymsha sharalar qabyldanady, – dedi TJ mınıstri.
Aıta keteıik, búgin Úkimet jumys ornyndaǵy qaýipsizdik máselesin qarastyryp jatyr.
Buǵan deıin sala mınıstri jumysshylar qaza tapqan «Vostoktsvetmet» pen «Qaztsınktegi» apat boıynsha tergeý júrip jatqanyn aıtqan edi.
