Tótenshe jaǵdaı bolǵan aýmaqqa kirmeýimiz kerek edi — Uldana Myrzýannyń áriptesi
ASTANA. KAZINFORM — Astanada jedel járdem feldsheri Uldana Myrzýan qazasyna qatysty sot protsesi jalǵasyp jatyr. Kezekti sot otyrysynda marqummen birge oqıǵa ornynda jumys istegen áriptesi Aqtamaq Syzdyqova kýáger retinde jaýap berdi.
Onyń aıtýynsha, qaıǵyly oqıǵa bolǵan kúni onyń brıgadasy kúndizgi aýysymǵa shyqqan. Jumys bastalar aldynda qyzmetkerler qaýipsizdik tehnıkasy boıynsha mindetti nusqamadan ótip, arnaıy jýrnalǵa qol qoıǵan.
Sonymen birge Aqtamaq Syzdyqova jedel járdem qyzmetkerlerine arnalǵan ishki nusqaýlyq boıynsha dárigerlerdiń tótenshe jaǵdaı bolǵan orynǵa tikeleı kirýge bolmaıtynyn túsindirdi. Sebebi ǵımarattyń qaıta opyrylý qaýpi bolǵan.
Medıtsına qyzmetkerleri qutqarýshylardy kútip, zardap shekkenderdi qaýipsiz jerge shyǵarǵannan keıin ǵana kómek kórsetýge tıis bolǵan.
Alaıda qaıǵyly jaǵdaı kezinde oqıǵa ornynda medıtsınalyq kómekke muqtaj adamdar bolǵan, al Tótenshe jaǵdaılar mınıstrliginiń qyzmetkerleri áli kelmegen. Osyǵan baılanysty medıtsına qyzmetkerleri ishke kirýge sheshim qabyldaǵan.
— Biz tótenshe jaǵdaı bolǵan aýmaqqa kirmeýimiz kerek edi, biraq onda adamdar boldy, TJM qyzmetkerleri joq edi. Sondyqtan ishke kirip, kómek kórsetýge týra keldi, — dedi kýáger.
Onyń aıtýynsha, shaqyrtý kezinde bastapqyda ǵımarattyń qasbeti qulaǵany týraly aqparat kórsetilgen. Alaıda jedel járdem qyzmetkerlerinde qajetti jeke qorǵanys quraldary bolmaǵan.
Aqtamaq Syzdyqova oqıǵa ornynda ózi men Uldana Myrzýannyń eki jaqqa bólinip ketkenin de aıtty.
— Ol jerde adam óte kóp boldy. Sóıtip, qalaı bolǵanyn bilmeımin, eki jaqqa bólindik. Men basqa jaqqa kettim, Uldana basqa jaqqa bardy, — dep túsindirdi ol.
Kýáger ǵımarattyń qulaǵan sátin ózi kórmegen. Onyń aıtýynsha, eki jedel járdem brıgadasy oqıǵa ornynda shamamen 10-15 mınýt bolǵan. Osy ýaqytta oqıǵa ornyna Tótenshe jaǵdaılar mınıstrliginiń, polıtsııanyń nemese basqa da shuǵyl qyzmetterdiń ókilderi kelmegen.
Uldana Myrzýandy qaýipti aımaqtan alyp shyqqannan keıin áriptesteri oǵan medıtsınalyq kómek kórsetip, aýrýhanaǵa jetkizgen. Kýágerdiń aıtýynsha, feldsher es-tússiz bolǵan jáne qabyldaý bólimine bara jatqan jolda esin jımaǵan.
Sonymen birge Aqtamaq Syzdyqovanyń aıtýynsha, monıtor júrek soǵysy men tamyr soǵysynyń bar ekenin kórsetken. Uldanaǵa ottegi berilip, kóktamyr arqyly ınfýzııalyq terapııa bastalǵan.
Kýáger qaıǵyly oqıǵadan keıin qalalyq jedel medıtsınalyq járdem stantsııasynda qyzmettik tekserý júrgizilgenin de aıtty. Alaıda onyń sózinshe, tekserý nátıjesi qyzmetkerlerge habarlanbaǵan.
Oqıǵadan keıin jumys tártibi jalpy ózgermegen. Degenmen qyzmetkerlerge qaýipsizdik tehnıkasyn saqtaý jáne qaýipti aımaqtarǵa kirmeý qajettigi qosymsha eskertile bastaǵan.
Aıta keteıik, buǵan deıin feldsher Uldana Myrzýannyń áriptesi Dilnaz Baızaqova kýáger retinde jaýap berdi.
Taǵy bir jábirlenýshi alǵan aýyr jaraqatyn aıtyp, ótemaqy talap etti.
