Qaýipsizdikti saqtamaǵannan órt shyqsa, úı ıesi jazalana ma — mınıstrlik jaýaby
ASTANA. KAZINFORM — Turǵyn úı ıesiniń órt qaýipsizdigin saqtamaý saldarynan tilsiz jaý beleń alsa qandaı jaýapkershilik qarastyrylǵan? Bul saýalǵa Tótenshe jaǵdaılar mınıstrliginiń ókili jaýap berdi.
— Órt qaýipsizdigine qatysty reıdtik is-sharalar jaz aılarynda bastalady. Reıd kezinde turǵyn úılerdi aralap, pesh jaǵýǵa qatysty qaýipsizdik erejeleri boıynsha nusqama beriledi. Aıta ketetin jaıt, reıd kezinde turǵyn úıdiń ıesine aıyppul nemese basqa da jaza qoldanylmaıdy, tek qana eskertý aıtylady. Biraq turǵyndardyń órt qaýipsizdigin saqtamaýy saldarynan órt shyqqan jaǵdaıda, ákimshilik quqyq buzýshylyq dep tanylyp, hattama toltyrylýy múmkin, — dedi TJM órtke qarsy qyzmet komıtetiniń bas mamany Eldos Zııada ortalyq kommýnıkatsııalar qyzmeti alańynda ótken baspasóz máslıhatynda.
Aıta keteıik, jyl basynan beri elimizde 1 myńnan astam órt shyǵý faktisi tirkelip, 52 adam ajal qushty.
Birer kún buryn Talǵarda dóńgelek zaýytynan shyqqan órt shyqqan edi. Oqıǵa ornyna Tótenshe jaǵdaılar mınıstri Shyńǵys Árinov bardy.