Qaýipsizdik jaǵdaıy nasharlaǵan óńirlerge azamattarymyzdyń shyǵýyna ýaqytsha shekteý engizilmek
ASTANA. KAZINFORM — Qaýipsizdik jaǵdaıy nasharlaǵan óńirlerge azamattarymyzdyń shyǵýyna ýaqytsha shekteý zańnamalyq turǵyda engizilmek. Bul týraly Májilis depýtattaryna Premer-mınıstr Oljas Bektenovtiń jaýabynda aıtylǵan.
— Qaýipsizdik jaǵdaıy nasharlaǵan óńirlerge azamattardyń shyǵýyna qatysty aldyn alý sharalaryn kúsheıtý qajettigi baıqaldy. Evakýatsııalyq kezeńde keıbir azamattardyń qaqtyǵys aımaqtaryna saparyn jalǵastyrýy qosymsha júkteme týǵyzdy. Osyǵan baılanysty mundaı óńirlerge shyǵýdy ýaqytsha shekteýge múmkindik beretin zańnamalyq tetikter ázirlenetin bolady, — dedi Premer-mınıstr jaýabynda.
Úkimet basshysynyń jaýabyna berilgen anyqtamaǵa qaraǵanda, evakýatsııalaý jumystary júrip jatqan kezeńde Almaty qalasynan Dýbaı men Shardja qalalaryna 191 azamatymyzdyń ushyp barǵan faktileri tirkelgen.
— Osyǵan oraı daǵdarys jaǵdaılarynda ulttyq jáne otandyq áýe tasymaldaýshylaryn jedel jumyldyrý tártibin jetildirý, sondaı-aq tótenshe jaǵdaılar muqtajdyǵy úshin arnaıy áýe kemelerin satyp alý múmkindikterin qosymsha qarastyrý josparlanyp otyr. 2026 jylǵy 10 aqpandaǵy Qazaqstan Respýblıkasy Úkimetiniń keńeıtilgen otyrysynda berilgen Memleket basshysynyń tapsyrmasyn oryndaý sheńberinde 2026 jyly Qarjy naryǵyn retteý jáne damytý agenttigi Ulttyq bankpen birlesip, saqtandyrý sektoryn damytýdyń 2030 jylǵa deıingi baǵdarlamasynyń jobasyn jáne «Saqtandyrý qyzmeti týraly» jańa Zańnyń jobasyn ázirleýge kiristi. Osyǵan baılanysty saqtandyrý salasyndaǵy memlekettik-jekeshelik áriptestiktiń formatyn keńeıtý jáne áleýetin nyǵaıtý máseleleri saqtandyrý týraly jańa zań jobasyn ázirleý kezinde qaralatyn bolady, — dedi Oljas Bektenov.
Aıta keteıik, Májilis depýtaty Serik Erýbaev Premer-mınıstr Oljas Bektenovten Irandaǵy áskerı operatsııalar kezinde Taıaý Shyǵysta qalyp qoıǵan qazaqstandyq týrısterdi elge ákelý bıýdjetke qansha shyǵyn ákelgenin surap, saýal joldaǵan edi.
