Qaýipsizdik talaptary buzylyp, jumysy toqtaǵan kásiporyndar 4,5 ese ulǵaıǵan

ASTANA. KAZINFORM – Jyl basynan beri Tótenshe jaǵdaılar mınıstrligi 16 myńǵa jýyq obektiniń órt jáne ónerkásiptik qaýipsizdigin tekserip, 100 myńnan astam buzýshylyqty anyqtady. Bul týraly sala mınıstri Shyńǵys Árinov málim etti.

Mınıstrlik eldegi órt jáne ónerkásiptik qaýipsizdikti qamtamasyz etý maqsatynda tıisti tekserister júrgizedi. Jyl basynan beri 16 myńǵa jýyq obekt tekserilip, 100 myńnan astam buzýshylyq anyqtalǵan.

− Jumysshylardyń ómiri men densaýlyǵyna qaýip týdyratyn óreskel buzýshylyqtarǵa baılanysty 7,5 myńnan astam nysannyń jumysy toqtatyldy. Atap aıtqanda, órtke qarsy avtomatıka júıesiniń bolmaýy nemese onyń durys jumys istemeýi, jumysshylardy qyzmetke oqytyp-úıretpesten, nusqaýlyq júrgizbeı jiberý, evakýatsııalyq shyǵý joldaryna kedergi keltirip bitep tastaý sııaqty órt qaýipsizdigi erejeleriniń buzylýynan obektilerdiń 95%-y toqtatyldy, − dedi Sh.Árinov Úkimet otyrysynda.

Jyl basynan beri 4,5 myńnan astam órt-taktıkalyq oqý-jattyǵýlary men sabaqtary ótkizilgen. Áıtse de, ónerkásiptik qaýipsizdik talaptarynyń buzylýy saldarynan obektilerdi toqtatý sany 4,5 esege ulǵaıǵan.

− Qaýipti óndiristik obektilerde anyqtalǵan buzýshylyqtar kóbinese adam ólimine nemese jumysshylardyń jaraqat alýyna ákep soǵatyn jazataıym oqıǵalarmen qatar júredi. Bıylǵy qańtar-mamyr aralyǵynda munaı-hımııa jáne taý-ken salasynda 11jazataıym oqıǵa, qazandyq jáne gaz sharýashylyǵy, ósimdik shıkizatyn óńdeý obektilerinde 60-tan astam oqıǵa tirkeldi. 22 jumysshy jaraqat alyp, 15 adam qaıtys boldy, − dedi TJ mınıstri.

Aıta keteıik, Eńbek jáne halyqty áleýmettik qorǵaý mınıstri Svetlana Jaqypova elimizde ótken jyly eńbek jaǵdaıyndaǵy oqys oqıǵalardan 202 adam qaza bolǵanyn aıtqan edi.