Qaýipsizdik qorǵaý jolyndaǵy 30 jyl: Aqmola oblysynda Qutqarýshylar kúni atalyp ótti
KÓKShETAÝ. KAZINFORM — Aqmolalyq qutqarýshylar kásibı merekeci men Qazaqstan Respýblıkasy Tótenshe jaǵdaılar mınıstrliginiń 30 jyldyǵy qarsańynda marapattaldy, dep habarlaıdy Kazinform tilshisi.
«Kókshetaý» Mádenıet saraıynda Qazaqstan Respýblıkasy Tótenshe jaǵdaılar mınıstrliginiń 30 jyldyǵyna oraılastyrylǵan merekelik shara ótti.
Mereke qonaqtary úshin zamanaýı órt sóndirý jáne qutqarý tehnıkalary, sonyń ishinde sońǵy jyldary paıdalanýǵa berilgen kólikterdiń kórme uıymdastyryldy.
Saltanatty shara Tótenshe jaǵdaılar mınıstri general-maıor Shyńǵys Árinovtyń quttyqtaý sózimen ashyldy, ol qutqarýshylardyń joǵary kásibıligi men janqııarlyǵyn joǵary baǵalady.
— Qutqarýshylar jyl saıyn órt pen oqys oqıǵaǵa toqsan myńnan astam ret shyǵyp otyr. Jyl saıyn apat aımaqtarynan ondaǵan myń adam evakýatsııalanady, taǵy myńdaǵan adam medıtsınalyq jáne psıhologııalyq kómek alady. Tek 2025 jyldyń basynan beri toǵyz myńnan astam azamat qutqarylyp, zardap shekken myńdaǵan adamǵa kómek kórsetildi. Árqaısysynyń artynda ómir bar ekenin túsinbeıinshe, bul jaı sandar bolyp kórinedi: bireý úıindi astynan shyǵarylsa, ekinshisi órtten nemese muz astynan qutqarylǵan… Qutqarýshylarǵa eń jaqsy alǵys — olar ketkennen keıin keıde estıtin qarapaıym «Rahmet, siz úlgerdińiz» degen bir aýyz sóz, — delingen quttyqtaý mátininde.
Aımaq qutqarýshylaryn Aqmola oblysy ákiminiń orynbasary Murat Balpan quttyqtap, aqmolalyq qutqarýshylardyń úlgisin kórsetken Asqar Zabıkýlınniń qaharmandyǵyn mysalǵa keltirdi. Oblystyń týmasy 2022 jyly oılanbastan otqa kirip, úsh adamnyń ómirin aman alyp qalyp, naǵyz erlik jasady.
— Qandaı jaǵdaıda da qutqarýshylar qaısarlyq, kásibılik pen qaharmandyq tanytyp, keıde óz ómirlerin qaterge tige otyryp, árqashan birinshi bolyp kómekke keledi, — dep atap ótti M.Balpan.
Aqmola oblysy TJD bastyǵy Baqytjan Alashov óz sózinde ondaǵan adamnyń ómirin saqtap, júzdegen keleńsiz jaǵdaılardyń sheshilýine jaýapty qyzmetkerler eńbeginiń mańyzdylyǵyna toqtaldy. Ol sondaı-aq jaqsy jańalyqtarymen bólisti — aldaǵy ýaqytta departament qyzmetkerlerine turǵyn úı tólemderi jasalady.
Mereke marapattaý rásimimen jalǵasty. Erekshelengen qutqarýshylarǵa Tótenshe jaǵdaılar mınıstriniń jáne oblys ákiminiń alǵys hattarymen birge Tótenshe jaǵdaılar mınıstrliginiń 30 jyldyǵyna arnalǵan tósbelgiler tabystaldy.
Marapatqa ıe bolǵandar qatarynda 23 jyl boıy adamdardy qutqarýmen aınalysyp kele jatqan Bulandy aýdandyq Tótenshe jaǵdaılar bóliminiń bastyǵy Samat Bápishev te boldy. Ol ómiri qutqarýshylarǵa baılanysty bolǵandyqtan eńbegin basqalarmen salystyrýǵa bolmaıtynyn moıyndady.
— Qutqarýshy bolýdy bala kúnnen armandadym. Bir qutqarylǵan adam búkil álemmen teń dep beker aıtpaǵan, — dep bólisti Samat.
Bıyl Bulandy aýdanynda arnaıy ámbebap órt sóndirý bólimi qurylyp, onda qutqarýshylar, órt sóndirýshiler, jedel járdem qyzmetkerleri ornalasty. Tájirıbe mundaı jumystyń yńǵaılylyǵyn kórsetti: órt sóndirýshiler de, feldsherler de qońyraýǵa bir ýaqytta shyǵady, sondyqtan qajet bolǵan jaǵdaıda jedel járdem kútýdiń qajeti joq.
Qonaqtardy departament jasaǵan órt sóndirýshiler men qutqarýshylardyń qyzmetine arnalǵan beınebaıan tusaýkeseri erekshe qyzyqtyrdy. Shara Tótenshe jaǵdaılar departamenti men mádenıet basqarmasy qyzmetkerleri daıyndaǵan merekelik kontserttik baǵdarlamamen aıaqtaldy.
Aqmolalyq bólimsheler jyl basynan beri 234 adamdy qutqaryp, 578-in qaýipti aımaqtardan evakýatsııalap, 70 zardap shekkenge alǵashqy medıtsınalyq kómek kórsetti. Aqmola oblysy ákiminiń qatysýy arqasynda 78 qutqarýshynyń otbasy tıimdi qarjylandyrý arqyly baspanaǵa qol jetkizdi.