Qaýipsizdik Keńesiniń hatshysy Birinshi halyqaralyq qaýipsizdik forýmyna qatysty
ASTANA. KAZINFORM — 27-28 mamyrda Reseı Federatsııasynyń Máskeý oblysynda Birinshi halyqaralyq qaýipsizdik forýmy ótti, dep habarlaıdy Aqordanyń baspasóz qyzmeti.
Jıynǵa Qazaqstan Respýblıkasy Qaýipsizdik Keńesiniń Hatshysy Ǵızat Nurdáýletov qatysty.
Reseı Qaýipsizdik Keńesi uıymdastyrǵan is-sharaǵa ár eldiń qaýipsizdik keńesterinen, quqyq qorǵaý jáne arnaıy organdarynan, syrtqy saıası vedomstvolarynan, sondaı-aq halyqaralyq uıymdardan turatyn 100-den astam delegatsııa jınaldy.
Plenarlyq otyrys «Kóppolıarly álemdik tártiptiń qalyptasýy jaǵdaıyndaǵy halyqaralyq qaýipsizdikke syn-qaterler men qaterler» taqyrybyna arnaldy. Talqylaý aıasynda qatysýshylar halyqaralyq jaǵdaıdyń negizgi damý úrdisterine, jahandyq syn-qaterlerge jáne olarǵa qarsy turý sharalaryna qatysty pikir almasty.
Qazaqstannyń Qaýipsizdik Keńesiniń Hatshysy sóz sóılep, elimizdiń halyqaralyq turaqtylyq tetikterin nyǵaıtýǵa qatysty ustanymdaryn belgilep berdi.
Kólik, energetıka jáne logıstıka ınfraqurylymynyń turaqtylyǵy strategııalyq ólshemge ıe bolatyny atap ótildi. Olardyń úzdiksiz jumys isteýin jáne erkin qol jetkizýdi kepildendirý kóppolıarly álemdegi jańa qaýipsizdik arhıtektýrasynyń negizgi elementi bolýy kerek.
— Qazaqstan memleketterdiń kıberkeńistiktegi jaýapty minez-qulqynyń ámbebap normalaryn qalyptastyrýdy, tsıfrlyq qaýipsizdik salasyndaǵy kópjaqty yntymaqtastyqty nyǵaıtýdy jaqtaıtynyn atap ótti, — delingen habarlamada.
Forým aıasynda TMD-ǵa múshe memleketterdiń Qaýipsizdik keńesteri hatshylarynyń beıresmı kezdesýi ótti.
Sondaı-aq is-shara aıasynda Ǵ.Nurdáýletov birqatar sheteldik áriptesterimen kelissózder júrgizip, ekijaqty ózara yqpaldastyq máselelerin qarastyrdy.
Buǵan deıin Nurdáýletov Ortalyq Azııa men Reseı qaýipsizdik keńesteri hatshylarynyń kezdesýine qatysqanyn jazǵanbyz.
