Qaýipsizdik keńesi BUU-nyń Iranǵa qarsy barlyq sanktsııalaryn qalpyna keltirýge daýys berdi

ASTANA. KAZINFORM — BUU Qaýipsizdik keńesi 2015 jylǵy ıadrolyq kelisimnen keıin toqtatylǵan Iranǵa qarsy sanktsııalardy qalpyna keltirý týraly sheshim qabyldady, dep habarlaıdy BBC.

Ulybrıtanııa, Frantsııa jáne Germanııa Irandy eshqashan ıadrolyq qarýǵa umtylmaıdy, ıemdenbeıdi nemese jasamaıdy dep kepildik beretin negizgi kelisimdi buzdy dep aıyptady. Olardy AQSh pen taǵy 6 el qoldady. Al Qytaı, Pákistan jáne Reseı sanktsııalardy toqtatý merzimin uzartýǵa daýys berdi.

Endi Iran men eýropalyq kóshbasshylar kelisimge kelmese, kelesi senbi, ıaǵnı 26 qyrkúıek kúni sanktsııalar qaıtadan kúshine enedi.

Brıtanııanyń BUU-daǵy elshisi Barbara Výdvord Reuters agenttigine bergen suhbatynda:

— Eń qarapaıym sharttar oryndalmaı, tez arada dıplomatııalyq sheshimge jetýdiń naqty joly joq. Biz Irannyń áli qajetti qadamdardy jasamaǵanyna qynjylamyz jáne ony dereý áreket etýge shaqyramyz, — dedi.

2015 jylǵy ıadrolyq kelisim — Birlesken jan-jaqty áreket jospary (JCPOA) — Iran men álemniń 5 derjavasy arasynda 3 jylǵa jýyq kelissózderden keıin eń joǵary deńgeıde jasalǵan. Iran 2019 jyly Donald Tramptyń birinshi prezıdenttik merzimi kezinde birjaqty shyǵýyna jaýap retinde kelisimnen shyqty.

Buǵan deıin AQSh Irannyń qarýly kúshterin qoldaıtyn qarjylyq jelige sanktsııa engizdi.

Sondaı-aq EO Reseıdiń «Mır» tólem júıesine qarsy jańa sanktsııalar daıyndap jatyr.