Qaýipsizdik keńesi AQSh-tyń Ýkraınaǵa qatysty usynǵan qararyn qabyldady

ASTANA. KAZINFORM – Ýkraınaǵa qatysty qarar jobasynda «Reseı Federatsııasy men Ýkraına arasyndaǵy qaqtyǵys kezinde adamdardyń qaıǵyly qazasyna» ókinish bildirilip, «janjaldy tez arada toqtatýǵa» úndeý jasaldy, dep habarlaıdy «BUU jańalyqtary».

«Ýkraına men Reseı Federatsııasy arasynda uzaq beıbitshilik ornatýdy» «tabandylyqpen shaqyratyn» qarardy on el qoldady, qarsy shyqqan el bolǵan joq, jáne bes el daýys bergende qalys qalǵan. Bul qaqtyǵys bastalǵannan beri Qaýipsizdik keńesiniń Ýkraınaǵa qatysty qabyldaǵan alǵashqy qarary boldy.

Qaýipsizdik Keńesine múshe memleketter usynǵan túzetýlerdiń eshqaısysy – úsheýi eýropalyq elder jáne ekeýi Reseıden – qabyldanǵan joq. Keıbireýleri daýystyń jetispeýshiliginen bolsa, bireýi turaqty músheniń veto qoıýyna baılanysty boldy.

Buǵan deıin dúısenbi kúni AQSh dál osyndaı qarardy Bas assambleıada daýysqa saldy. Alaıda ol Eýropa elderi usynǵan túzetýlermen qabyldandy.

Buǵan deıin AQSh prezıdenti Tramp AQSh pen Reseı arasynda Ýkraınaǵa qatysty kelissózderdiń ekinshi raýndy týraly aıtty. 

Ol kelissózderdiń 25-shi aqpan kúni Saýd Arabııasynyń astanasy Er-Rııad qalasynda, sol qalada bir apta buryn bolǵan birinshi raýndtan keıin ótetinin habarlady.