«Qaýipsiz jol»: Qyzylordada eki aptada 5 myńǵa jýyq quqyq buzý deregi tirkeldi
QYZYLORDA. KAZINFORM – ІІM-niń nusqaýyna sáıkes jol júrisi qaǵıdalaryn buzýdyń aldyn alý jáne anyqtaý maqsatynda 19 sáýir men 19 mamyr aralyǵynda elimizde «Qaýipsiz jol» jedel profılaktıkalyq is-sharasy ótip jatyr.
Іs-sharanyń 13 kúninde Qyzylorda oblysynda 4 986 quqyq buzý deregi anyqtaldy. Onyń ishinde mindetti saqtandyrý týraly zańnamany buzýdyń 373, belgilengen tártippen tirkelmegen kólik quralyn basqarýdyń 131, zańsyz qaıta jabdyqtaýdyń 85, qaýipsizdik beldigin taqpaý jáne tasymaldaý qaǵıdalaryn buzýdyń 946, jaıaý júrginshige jol bermeýdiń 153 faktisi tirkeldi.
– 226 adam kólik tizgininde uıaly telefonmen sóılesken, 214 kólik mindetti tehnıkalyq tekserýden ótpegen, 153 júrgizýshi jaıaý júrginshige jol bermegen, 47 júrgizýshi mas kúıinde rýl tizgindegen. Al 542 adam jaıaý júrginshiler jolaǵynan ótpegen, 32 júrgizýshi avarııalyq jaǵdaı týǵyzǵan, - delingen Qyzylorda oblystyq polıtsııa departamentiniń habarlamasynda.
Sonymen qatar 540 avtokólik aıyp turaǵyna qoıylyp, 161 avtokóliktiń qozǵalysyn shekteý maqsatynda memlekettik tirkeý nómir belgileri alyndy.
Osy oraıda qyzylordalyq polıtseıler barlyq sanattaǵy kólik júrgizýshilerin jol qaýipsizdigi erejelerin saqtaýǵa, jol-kólik oqıǵalaryn jasamaýǵa, óziniń jáne árbir jaıaý júrginshiniń ómirine jaýaptylyqpen qaraýǵa shaqyrady.
Buǵan deıin «Qaýipsiz jol» is-sharasynyń nebári eki kúnnde Qyzylorda oblysynda 132 kólik aıyp turaǵyna qoıylyp, 52 avtokóliktiń memlekettik nómiri alynǵanyn jazǵanbyz.