«Qaýipsiz aýla»: Qyzylordada 241 quqyq buzý deregi anyqtaldy
QYZYLORDA. KAZINFORM — 28 qańtar men 3 aqpan aralyǵynda Qyzylorda oblysynda «Qaýipsiz aýla» jedel profılaktıkalyq is-sharasy ótti.
Іs-sharanyń 6 kúninde ishki ister organynyń esebindegi 1852 adamnyń turǵylyqty meken-jaılary tekserildi. Al ýchaskelik ınspektorlar shartty túrde merziminen buryn bosatylǵan, maskúnemder, nashaqorlar, probatsııa esebinde turǵandar men qolaısyz otbasylardy aralap, profılaktıkalyq túsindirme jumysyn júrgizdi.
— 241 quqyqbuzýshylyq anyqtalyp, tıisti sharalar qabyldandy. Onyń ishinde alkogol ónimin belgilenbegen ýaqytta satýdyń – 14, qoǵamdyq oryndarǵa masań kúıde kelýdiń 166 deregi, 42 usaq buzaqylyq anyqtaldy. 32 maskúnem men 2 nashaqor esepke qoıyldy. Belgili turaǵy joq 14 adam qabyldap-taratý ornyna ornalastyryldy, — dedi oblystyq polıtsııa departamenti qoǵamdyq qaýipsizdik basqarmasy bastyǵynyń mindetin atqarýshy Raýan Áldeshov.
Budan basqa 19 jasósipirim kóńil kóterý ornynda zańdy ókiliniń ertýinsiz júrgeni úshin ustaldy. Túngi ýaqytta jalǵyz ózi kóshede júrgen 5 bala beıimdeý ortalyǵyna jetkizildi.
Eske salaıyq, Іshki ister mınıstrliginde polıtsııa jumysynyń tıimdiligin arttyrýǵa jáne azamattardyń qaýipsizdigin qamtamasyz etýge baǵyttalǵan drondar tárizdi tsıfrlyq tehnologııalardy júıeli túrde engizý jumysy jalǵasyp keledi.