Qaýipsiz jol: BQO-da 4 700-den astam quqyq buzýshylyq anyqtaldy
ORAL. KAZINFORM – Batys Qazaqstan oblysynda «Qaýipsiz jol» jedel aldyn alý is-sharasy jol erejesin buzýshylyqtyń azaımaı otyrǵanyn kórsetti.
BQO polıtsııa departamentiniń baspasóz qyzmetinen málim etkenindeı, óńirde 15-26 qyrkúıek aralyǵynda 4 730 quqyq buzýshylyq tirkeldi.
Sonyń ishinde 40 adam kólikti mas kúıinde aıdaǵany úshin júrgizýshi quqyǵynan aıyrylyp, ákimshilik qamaýǵa alyndy.
Sondaı-aq 125 júrgizýshi QR Ákimshilik quqyq buzýshylyq kodeksiniń 612-baby 2-bóligi, taǵy 33-i 612-baby 3-bóligine sáıkes jaýapqa tartyldy.
Jol qozǵalysy erejesin buzǵan 917 jaıaý júrginshi de 615-bapqa sáıkes jazasyz qalmady. 51 júrgizýshi jolaýshylardy zańsyz tasymaldaǵan. Barlyǵy 362 avtokólik aıyp turaǵyna qoıyldy.
- Eń ókinishtisi, jol erejesin buzýshylyqtyń sońy adam ólimine soqtyryp jatady. 23 qyrkúıek kúni saǵat 11.45 shamasynda Chevrolet Cobalt kóliginiń júrgizýshisi M.Mámetova kóshesimen kele jatyp, Á.Kerderi kóshesine burylar tusta jol erejesin buzǵan. Atap aıtqanda, Toyota Mark X kóliginiń ótýine múmkindik bermegen. Sonyń saldarynan Chevrolet Cobalt avtokóliginde otyrǵan eki jolaýshy áıel oblystyq kópbeıindi aýrýhanaǵa jetkizildi. Onyń biri, 1993 jylǵy áıel aýrýhanada kóz jumdy. Qazirgi kezde QR QK 345-baby 3-bóligine sáıkes sotqa deıingi tergeý amaldary júrgizilýde, - dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, 1984 jylǵy áıel es-tússiz kúıde. Jaǵdaıy óte aýyr.
Eske sala keteıik, budan buryn Batys Qazaqstanda jol apattary saldarynan 50-den astam adam kóz jumǵanyn jazǵan edik.