«Qaýipsiz jol» aktsııasy kezinde 450-den astam zań buzýshylyq anyqtaldy
ASTANA. KAZINFORM – Qazaqstanda «Qaýipsiz jol» respýblıkalyq profılaktıkalyq aktsııasy barysynda 450-den astam ákimshilik quqyq buzýshylyq anyqtaldy, dep habarlaıdy Kólik mınıstrligi.
Aktsııany Avtomobıl kóligi jáne kóliktik baqylaý komıteti 2026 jylǵy 15-30 maýsym aralyǵynda respýblıka aýmaǵynda ótkizdi.
Іs-sharanyń maqsaty – jol qozǵalysy qaýipsizdigin arttyrý, jolaýshylar kóliginiń qatysýymen bolatyn jol-kólik oqıǵalarynyń aldyn alý, jazǵy saýyqtyrý kezeńinde balalardy qaýipsiz tasymaldaýdy qamtamasyz etý jáne jolaýshylar tasymaly salasyndaǵy zań talaptarynyń saqtalýyn baqylaýdy kúsheıtý.
– Aktsııa aıasynda kóliktik baqylaýdyń aýmaqtyq ınspektsııalary ishki ister organdarymen birlesip respýblıkalyq jáne jergilikti mańyzy bar avtomobıl joldarynda reıdtik is-sharalar ótkizdi, – delingen habarlamada.
Tekserý kezinde tasymaldaýshylardyń jolaýshylar men bagajdy tasymaldaý qaǵıdalaryn saqtaýy, qajetti ruqsat qujattarynyń bolýy, kólik quraldarynyń tehnıkalyq jaı-kúıi, júrgizýshilerdiń eńbek jáne demalys rejımi, sondaı-aq qaýipsizdik talaptarynyń oryndalýy nazarǵa alyndy.
Aktsııa qorytyndysy boıynsha jolaýshylar tasymalyn júzege asyratyn 800-ge jýyq kólik quraly tekserildi. Nátıjesinde 450-den astam ákimshilik quqyq buzýshylyq anyqtalyp, tıisti materıaldar rásimdeldi.
Mınıstrliktiń málimetinshe, ótkizilgen is-sharalar avtomobıl kóligi salasyndaǵy zań buzýshylyqtardy anyqtaýǵa jáne olardyń aldyn alýǵa, jol qozǵalysyna qatysýshylardyń tártibin arttyrýǵa baǵyttalǵan.
Avtomobıl kóligi jáne kóliktik baqylaý komıteti jol qaýipsizdigin qamtamasyz etý jáne jolaýshylar tasymaly salasyndaǵy talaptardyń saqtalýyn baqylaý baǵytynda ishki ister organdarymen birlesken jumysty jalǵastyrady.
Aıta keteıik, 10 shildeden bastap eldegi tórt aqyly avtojolda ortasha jyldamdyq baqylanady.
