Qaýipsiz jol aktsııasy: aıypturaqqa 9 myńnan astam kólik jetkizildi

ASTANA. KAZINFORM – Іshki ister mınıstrliginiń resmı ókili Shyńǵys Alekeshev «Qaýipsiz jol» aktsııasynyń qorytyndysyn jarııalady.

«Byltyr elimizdiń joldarynda 2,5 myńnan astam adam qaza taýyp, 20 myńǵa jýyq adam jaralandy. Joldaǵy ereje buzý áreketteriniń, sondaı-aq jol apatynyń aldyn alý boıynsha sharalar belsendi túrde atqarylyp jatyr. Onyń ishinde respýblıka aýmaǵynda «Qaýipsiz jol» jedel-profılaktıkalyq is-sharasy uıymdastyryldy. Aktsııany ótkizýge 9,5 myń polıtsııa qyzmetkeri men basqa da memlekettik organdardyń myńǵa jýyq ókili jumyldyryldy», - dedi Sh. Alekeshev mınıstrliktiń aptalyq brıfınginde.

Onyń aıtýynsha, joldaǵy erejeni buzǵany úshin 360 myńnan astam adam ákimshilik jaýapkershilikke tartyldy. Patrýldik kólikterge ornatylǵan avtomattandyrylǵan qurylǵylar arqyly jyldamdyqty shekten asyrýdyń 87 myńnan astam deregi anyqtaldy. Aıypturaqqa 9 myńnan astam kólik jetkizilgen.

«Jol-kólik oqıǵalaryna jáne olardyń zardaptarynyń aýyrlyǵyna áser etetin sebepterdiń biri - joldardyń jaǵdaıy. Sondyqtan operatsııa aıasynda polıtseıler el boıynsha 8 myń zertteý jasady. Jol qaýipsizdigine keri áser etetin 23 myńnan astam kemshilik anyqtaldy. Olardy joıý týraly tıisti qyzmetterge 8 myńǵa jýyq nusqaý berilgen. Joldardy kútip ustaýǵa jaýapty 1179 adam ákimshilik jaýapkershilikke tartyldy», - dedi resmı ókil.

Aıta keteıik, «Qaýipsiz jol» aktsııasy 5-29 aqpan aralyǵyndaǵy ótti.