«Qaýipsiz jol» aktsııasy: Astanada qandaı zańbuzýshylyqtar anyqtaldy

Reıd kezinde jol qozǵalysy erejesiniń saqtalýy baqylaýǵa alynyp, ákimshilik aıyppuldaryn tólemegen boryshkerlerge qatysty sharalar qabyldandy. Sonymen qatar jol ınfraqurylymynyń jaı-kúıi tekserilip, jol qozǵalysy qaýipsizdigin arttyrýǵa baǵyttalǵan jumystar júrgizildi. Bul týraly Astana polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev Óńirlik kommýnıkatsııalar qyzmetinde ótken baspasóz máslıhatynda aıtty.

Eń jıi qandaı quqyq buzýshylyqtar anyqtaldy?

Nurlan Ývaevtyń aıtýynsha, aktsııanyń negizgi maqsaty — júrgizýshilerdiń jaýapkershiligin arttyrý, jol-kólik oqıǵalarynyń aldyn alý jáne joldaǵy qaýipsizdikti kúsheıtý.
Toǵyz kún boıy polıtsııa qyzmetkerleri kúsheıtilgen reıd júrgizip, jol-kólik oqıǵasyna jıi sebep bolatyn quqyq buzýshylyqtarǵa basymdyq berdi. Atap aıtqanda, mas kúıinde kólik basqarý, basyp ozý jáne manevr jasaý qaǵıdalaryn buzý, jol qıylystary men jaıaý júrginshiler ótkelderinen ótý talaptaryn saqtamaý, jolaýshylar men júkterdi tasymaldaý erejesin buzý, qaýipsizdik beldigin taqpaý jáne balalarǵa arnalǵan arnaıy qurylǵylardy paıdalanbaý derekteri jiti baqylaýda boldy.

— «Qaýipsiz jol» jedel-profılaktıkalyq is-sharasynyń qorytyndysy boıynsha elordada jol qozǵalysy erejesin buzýdyń 4 600-den astam deregi anyqtaldy, — dedi Nurlan Ývaev.

Onyń aıtýynsha, eń kóp tirkelgen quqyq buzýshylyqtar jolaýshylar men júkterdi tasymaldaý talaptaryn buzý men qaýipsizdik beldigin taqpaýǵa qatysty boldy. Osyndaı 1 699 derek tirkeldi.

Sondaı-aq kólik tizgininde uıaly telefon paıdalanǵany úshin 707 júrgizýshi ákimshilik jaýapkershilikke tartyldy. Al 185 adam júrgizýshi kýáliginsiz nemese kólik basqarý quqyǵynan aıyrylǵanyna qaramastan rólge otyrǵan.

Aıyppul tólemegen júrgizýshilerge qandaı shara qoldanyldy?

Іs-shara barysynda ákimshilik aıyppuldaryn tóleýden jaltaryp júrgen júrgizýshilerdi anyqtaýǵa baǵyttalǵan reıdter de uıymdastyryldy.

— Reıd nátıjesinde 190 kólik aıyp turaǵyna qoıylyp, 581 kóliktiń memlekettik tirkeý nómiri alyndy, — dedi Nurlan Ývaev.

Onyń sózinshe, bul sharalar ákimshilik aıyppuldardyń oryndalýyn qamtamasyz etý maqsatynda qabyldandy.

Jol ınfraqurylymynan qandaı kemshilikter anyqtaldy?

Reıd barysynda polıtsııa qyzmetkerleri quqyq buzýshylyqtardy anyqtaýmen qatar jol ınfraqurylymynyń jaı-kúıin de tekserdi.

Osy kezeńde kóshe-jol jelisinde 33 tekserý júrgizilip, avtomobıl joldary men jol qozǵalysyn uıymdastyrýdyń tehnıkalyq quraldaryn kútip ustaý boıynsha 72 kemshilik anyqtaldy.

Tekserý qorytyndysy boıynsha anyqtalǵan kemshilikterdi joıý úshin 13 nusqama berilip, jol qozǵalysyn uıymdastyrýdy jetildirýge qatysty usynystar engizildi.

Sonymen qatar jol jóndeý kezinde qaýipsizdik talaptaryn buzǵan merdiger uıymdar Ákimshilik quqyq buzýshylyq týraly kodekstiń 630 jáne 631-baptary boıynsha ákimshilik jaýapkershilikke tartyldy.

Aktsııa aıasynda jol ınfraqurylymyn jetildirýge jáne qozǵalys qaýipsizdigin kúsheıtýge baǵyttalǵan birqatar shara júzege asyryldy. Osy kezeńde jer qazý jumystary júrgiziletin ýchaskelerge arnalǵan jol qozǵalysyn uıymdastyrýdyń 11 shemasy qaralyp, kólik aǵynynyń ózgerisi eskerilip, 17 ýchaskege jol tańbasy salyndy. Budan bólek, kóshe-jol jelisiniń 9 ýchaskesindegi shuńqyrlar jóndelip, joldyń ótkizý qabiletin arttyrý jáne qozǵalys qaýipsizdigin jaqsartý maqsatynda úsh baǵdarshamnyń jumys rejımi qaıta retteldi.

Nurlan Ývaevtyń aıtýyna qaraǵanda, reıd barysynda quqyq buzýshylyqtardyń aldyn alýǵa baǵyttalǵan túsindirý jumystary da júrgizildi. Júrgizýshiler men jaıaý júrginshilerge joldaǵy qaýipsizdik mádenıetin qalyptastyrýǵa arnalǵan jadynamalar men aqparattyq býkletter taratylyp, túsindirý aktsııalary uıymdastyryldy.

Sonymen qatar jol qozǵalysy erejelerin saqtaý jónindegi beınerolıkterdi qosa alǵanda 151 aqparattyq-túsindirý materıaly ázirlenip, jarııalandy. Qazir bul materıaldar qoǵamdyq kólikterde, turǵyn úı keshenderiniń lıftilerinde jáne elordanyń iri saýda-oıyn-saýyq ortalyqtarynda kórsetilip jatyr.

Sóz sońynda Nurlan Ývaev jol qozǵalysy erejesin saqtaý árbir jol qozǵalysyna qatysýshynyń qaýipsizdigin qamtamasyz etýdiń basty sharty ekenin atap ótip, júrgizýshiler men jaıaý júrginshilerdi zań talaptaryn qatań saqtaýǵa shaqyrdy.

Eske salaıyq, 25 tamyzdan bastap «Jol júrisi týraly» zańǵa engizilgen ózgerister kúshine enip, júrgizýshilerge qoıylatyn talaptar men jekelegen quqyq buzýshylyqtar úshin jaýapkershilik kúsheıtiledi.