«Qaýipsiz úı»: ShQO-da 112 quqyqbuzýshylyq anyqtaldy
ASTANA. KAZINFORM — Shyǵys Qazaqstan oblysynda respýblıkalyq «Qaýipsiz úı» jedel profılaktıkalyq is-sharasy qorytyndylandy. Bir aı ishinde polıtseıler múddeli organdarmen birlesip, erekshe nazar aýdarýdy qajet etetin 5 myńnan astam mekenjaıdy anyqtap, 975 qaýip faktoryn joıý boıynsha sharalar qabyldady. Jalpy, 12 myńǵa jýyq turǵyn úı tekserildi.
Polisia.kz málimetinshe, balalardyń quqyqtary men zańdy múddelerine nuqsan kelýi múmkin otbasylarǵa erekshe nazar aýdaryldy. Máselen, Rıdder qalasynda polıtsııa qyzmetkerleri, qorǵanshylyq jáne qamqorshylyq organdary men probatsııa qyzmetiniń mamandary birlesip júrgizgen tekserý barysynda 4 kámeletke tolmaǵan bala tárbıelenip jatqan otbasy anyqtaldy. Otbasy sanıtarlyq talaptarǵa saı kelmeıtin jaǵdaıda ómir súrgen. Turǵyn úıde azyq-túlik pen aýyzsý bolmaǵan.
Balalardyń ómiri men densaýlyǵyn, quqyqtaryn qorǵaý maqsatynda 4 bala da otbasynan alyndy. Onyń bireýi aýrýhanaǵa jatqyzylsa, úsheýi «Úmit» kámeletke tolmaǵandardy beıimdeý ortalyǵyna ornalastyryldy.
Profılaktıkalyq esepte turǵan adamdardy baqylaý da jumystyń mańyzdy baǵyttarynyń biri boldy. Polıtseıler 10 925 tekserý júrgizip, nátıjesinde 112 quqyqbuzýshylyqty anyqtady.
Turǵyndarmen baılanys ornatýǵa da basymdyq berildi. Polıtsııa qyzmetkerleri oblys turǵyndarymen 436 kezdesý ótkizip, oǵan 13 myńnan astam adam qatysty. Azamattardan 378 usynys túsip, onyń 341-i boıynsha tıisti sharalar qabyldandy.
— Jedel profılaktıkalyq is-sharanyń aıaqtalýy bul baǵyttaǵy jumystyń toqtaıtynyn bildirmeıdi. Turǵyndardyń ómir súrý jaǵdaıyn baqylaý, balalardyń quqyqtarynyń buzylýyna qatysty habarlamalarǵa der kezinde den qoıý, profılaktıkalyq esepte turǵan adamdardy qadaǵalaý jáne halyqpen ózara jumysty jalǵastyrý polıtsııa qyzmetiniń mańyzdy baǵyttary bolyp qala beredi, — delingen aqparatta.
Aıta keteıik, Oqý-aǵartý mınıstri BUU Bas hatshysynyń arnaıy ókilimen kezdesti. Elde balalardy qorǵaý júıesi jetildirilmek.
