«Qaýipsiz shotqa» aqsha aýdarý: Ulttyq bank qazaqstandyqtarǵa eskertý jasady
ASTANA. KAZINFORM — Teris pıǵyldy adamdar qazaqstandyqtarǵa azamattarǵa arnalǵan tsıfrlyq úkimet servısiniń nemese ekinshi deńgeıdegi bankterdiń atynan «tsıfrlyq senimhat» nemese «kredıt» resimdelgeni týraly habarlama jiberedi.
— Habarlamada alýshynyń atyna «tsıfrlyq senimhat» resimdelgeni, ony úshinshi tulǵalar paıdalanyp jatqany nemese kredıt alýǵa ótinim maquldanǵany aıtylady. Mán-jaıdy anyqtaý úshin kórsetilgen nómirge qońyraý shalý usynylady.
Mundaı habarlamanyń basty maqsaty — adamdy úreılendirip, kórsetilgen nómirge qońyraý shalýǵa májbúrleý. Telefon arqyly sóılesý kezinde alaıaqtar «senimhatty joıýdy», «kredıttik ótinimdi buǵattaýdy» nemese «aqshalaı qarajatty qorǵaýdy» usynady, — delingen habarlamada.
Keıin ózderin Ulttyq banktiń, arnaıy memlekettik nemese quqyq qorǵaý organdarynyń qyzmetkeri retinde tanystyrady. Olar azamattyń atyna kredıt resimdelgenin, kompanııalar tirkelgenin, kúdikti qarjy operatsııalary júrgizilgenin nemese aqsha qarajatyn jymqyrý áreketi jasalǵanyn habarlaıdy.
— Osyndaı áreketterdiń aldyn alýdy syltaýratyp, olar SMS arqyly kelgen kodty aıtýdy, bank kartasynyń derektemelerin berýdi, kúmándi mobıldi qosymshany ornatýdy, aqshany «qaýipsiz», «saqtyq» nemese «jınaq» shotyna aýdarýdy ne mobıldi qurylǵyny qashyqtan basqarýǵa ruqsat berýdi talap etedi.
Ulttyq bank bankterdiń, arnaıy memlekettik jáne quqyq qorǵaý organdarynyń qyzmetkerleri bank kartasynyń derektemelerin, SMS arqyly kelgen kodtardy, kartalar men qosymshalardyń PIN-kodtaryn suramaıtynyn eskertedi. Sondaı-aq, aqshany «qaýipsiz shottarǵa» aýdarýdy nemese mobıldi qurylǵyny qashyqtan basqarýǵa múmkindik beretin qosymshalardy ornatýdy da usynbaıdy, — delingen bank habarlamasynda.
Mundaı habarlamany alǵan kezde kórsetilgen nómirlerge qońyraý shalýǵa, kúmándi siltemelerge ótýge jáne belgisiz adamdardyń nusqaýlaryn oryndaýǵa bolmaıdy. Aqparatty tekserý úshin tıisti banktiń nemese azamattarǵa arnalǵan tsıfrlyq úkimet servısiniń resmı baılanys ortalyǵyna habarlasý kerek.
— Ulttyq bank qyzmetkerleri aýdıo jáne vıdeoqońyraýlar shalmaıtynyn, jeke tulǵalardyń shottaryna qyzmet kórsetpeıtinin, aqsha qarajatyn ınvestıtsııalyq paı qorlary men ózge de qarjy ónimderine ınvestıtsııalaýdy usynbaıtynyn, aqshalaı qarajatty saqtandyrýmen aınalyspaıtynyn, sondaı-aq halyqpen aqshalaı esep aıyryspaıtynyn eske salamyz.
Eger siz alaıaqtyq áreketke tap bolsańyz, Qazaqstan Respýblıkasynyń quqyq qorǵaý organdaryna aryzben júginýge keńes beremiz. Keńes alý úshin 1477 qysqa nómiri boıynsha Ulttyq banktiń baılanys ortalyǵyna habarlasýǵa bolady, — delingen habarlamada.
Aıta ketelik alaıaqtar kompanııa júıesine qarapaıym qyzmetker arqyly kirýi múmkin.
