Qaýipsiz saıahat: týrıster neni eskerýi kerek
ASTANA. KAZINFORM — «Zań men tártip» qaǵıdaty tek quqyq qorǵaý salasyn emes, ómirimizdiń barlyq baǵytyn, onyń ishinde týrızmdi de qamtıdy. Saıahatshynyń óz quqyqtaryn bilýi jáne mindetterin sezinýi — jaıly ári qaýipsiz demalystyń basty sharty, dep habarlaıdy elorda ákimdigini resmı saıty.
«Qazaqstan Respýblıkasyndaǵy týrıstik qyzmet týraly» zańda osy máseleler qarastyrylǵan. Zań boıynsha saıahatqa ázirlengen nemese saıahat jasap júrgen árbir týrıst mynadaı múmkindikterge ıe:
• Qaýipsizdik pen kómek. Jeke basyna nemese múlkine qaýip tóngen jaǵdaıda konsýldyq, dıplomatııalyq jáne ózge de memlekettik ókildikterge júginý.
• Aqparattyq aıqyndyq. Ýaqytsha bolatyn eldiń zańnamasy, jergilikti halyqtyń ádet-ǵuryptary, dinı salttary men kıeli oryndary týraly durys aqparat alý. Bul — zań buzýshylyqtyń aldyn alýdyń alǵashqy qadamy.
• Erkin qozǵalys. Ýaqytsha bolatyn elde qabyldanǵan shekteý sharalaryn eskere otyryp, týrıstik resýrstarǵa erkin qol jetkizý.
• Shuǵyl medıtsınalyq kómek. Kez kelgen ýaqytta qajetti medıtsınalyq járdem alý quqyǵy.
• Zalaldy óteý. Eger týrıstik qyzmet kórsetý sharty oryndalmasa, keltirilgen materıaldyq jáne moraldyq zııandy zań tártibimen óndirip alý.
«Zań men tártip» qaǵıdaty týrıstke tek erkindik berip qana qoımaı, jaýapkershilik te júkteıdi. Saıahat kezinde, onyń ishinde tranzıttik saparlarda týrıst mindetti:
- Zańdy saqtaý. Ýaqytsha bolatyn eldiń (jerdiń) qoldanystaǵy zańnamasyn qatań ustaný.
- Murany qorǵaý. Qorshaǵan ortaǵa uqypty qaraý, tabıǵı, tarıhı jáne mádenı eskertkishterdi saqtaý.
- Erejelerge baǵyný. Elge kelý, onda bolý jáne ketý erejelerin, sondaı-aq tranzıt elderiniń tártibin buzbaý.
- Jeke qaýipsizdik. Saıahat kezinde jeke óziniń qaýipsizdik erejelerin saqtaýǵa jaýapty bolý.
— Týrıstik saladaǵy «Zań men tártip» qaǵıdaty — bul eki jaqty jol. Týrıst zańdy saqtaý arqyly ózin quqyqtyq qıyndyqtardan qorǵaıdy, al memleket óz kezeginde týrıstiń quqyqtaryn qorǵaýǵa kepildik beredi. Basqa eldiń nemese aımaqtyń zańdaryn, mádenı erekshelikterin qurmetteý — saýatty týrıstiń basty belgisi. Zań aıasynda áreket etý arqyly siz ózińizdiń de, ózgeniń de qaýipsizdigin qamtamasyz etesiz, — delingen habarlamada.
Budan buryn Qyzylorda oblysyna kelgen týrıster sany 25,4% kóbeıgenin jazǵanbyz.
