Qaýipsiz mámile: avtomobıl men jyljymaıtyn múlik tirkelgenge deıin aqsha buǵattaýly turady
ASTANA. KAZINFORM – Avtomobıl men jyljymaıtyn múlikti satý jáne satyp alý kezinde nysan satyp alýshynyń atyna tirkelgenge deıin aqsha buǵattaýly turatyn mehanızm iske qosylmaq. Jańa joba týraly Úkimette ótken qarjy salasyna tsıfrlyq teńgeni engizý jónindegi jumys tobynyń alǵashqy otyrysynda aıtyldy.
Atap aıtqanda, qazirgi ýaqytta pılottyq rejımde iske qosý úshin kelesi jobalar pysyqtalyp jatqany málim boldy:
- Tsıfrlyq QQS: EShF júıesiniń tsıfrlyq teńge platformasymen ıntegratsııasy júrgizilip jatyr. Pılotty keńeıtý 2025 jyldyń sońyna deıin oryndalady.
- «Qaýipsiz mámile» jobasy: ІІM men JITsD mınıstrligi avtomobıl úshin aqsha qaıta tirkelgenge deıin buǵattalatyn mehanızmdi synaqtan ótkizip jatyr. Іske qosý merzimi – 2026 jylǵy sáýir. Dál osyndaı mehanızmdi jyljymaıtyn múlik mámileleri úshin qoldaný josparlanyp otyr.
- Qymbat medıtsınalyq jabdyqtardy satyp alý kezinde jáne iri ónerkásiptik nysandardy salýda tsıfrlyq teńgeni qoldaný.
- Tsıfrlyq teńge erekshelikteriniń biri – baǵdarlamalaý múmkindigi, ıaǵnı onyń jumsalýyna belgili bir sharttardy qoıýy. Avtokólik mámilelerine de atalǵan erekshelikti qoldaný kózdelip otyr. Demek, satyp alýshy satýshynyń rekvızıtteri boıynsha tsıfrlyq teńgemen tólem jasaý úshin qarajatty baǵdarlamalap, ony satýshyǵa jiberedi. Bul rette satýshy qarjyny avtokólik quraly memlekettik derekter bazasynda satyp alýshynyń atyna tirkelgennen keıin ǵana paıdalana alady. Taǵy bir artyqshylyǵy, mámile klıent pen túrli bankter arasynda qoljetimdi bolady. Osylaısha, bul qural tutynýshylarǵa yńǵaıly bolyp, ýaqyt únemdeýge kómektesedi jáne avtokólik satyp alý mámilelerin qaýipsiz júrgizýge múmkindik beredi. Sondaı-aq qolma-qol aqsha alý nemese bankke barý qajettiligin joıady, - dep túsindiredi Ulttyq banktiń baspasóz qyzmetinen.
Qazaqstan ekonomıkasy tsıfrlyq transformatsııa kezeńinde jańa qarjy quraldaryn engizýge bet burdy. Prezıdent Qasym-Jomart Toqaev bıylǵy Joldaýynda tsıfrlyq teńgeniń ulttyq ekonomıkany tsıfrlandyrýdaǵy mańyzdylyǵyn atap ótip, onyń tolyqqandy ekojúıesin qalyptastyrýdy jedeldetýdi tapsyrǵan bolatyn. Osy oraıda, Kazinform tilshisi tsıfrlyq teńgeniń el ekonomıkasyna qandaı múmkindik beretinin jáne qandaı táýekelder týdyratynyn sarapshylar pikiri negizinde taldap kórgen edi.