«Qaýipsiz qala»: Astanada sýǵa shomylý erejeleri túsindirildi
ASTANA. KAZINFORM — Elordada sýǵa shomylý maýsymynda qaýipsizdik sharalaryn túsindirýge baǵyttalǵan «Qaýipsiz qala» aktsııasy bastaldy.
Atalǵan aktsııany «AMANAT» partııasy janyndaǵy «Jastar rýhy» jastar qanaty, Tótenshe jaǵdaılar departamenti jáne Saryarqa aýdany ákimdiginiń apparatymen birlesip uıymdastyryp jatyr.
Іs-sharanyń maqsaty — shomylý maýsymy kezeńinde elorda turǵyndary men jastar arasynda sýdaǵy qaýipsizdik erejelerin saqtaý, tyıym salynǵan oryndarda shomylýdyń aldyn alý jáne qaıǵyly jaǵdaılardy boldyrmaý.
«Qaýipsiz qala» aktsııasy 9-12 maýsym aralyǵynda Astanadaǵy ruqsat etilgen jáne tyıym salynǵan sý aıdyndarynyń mańynda ótedi.
— Bul aktsııany ótkizý týraly sheshim shomylý maýsymynyń bastalýyna baılanysty qabyldandy. Qaýipsizdik sharalaryn keńinen túsindirý úshin blogerler, belsendi jastar men qoǵam belsendileri tartylyp otyr. Turǵyndar qaı jerde shomylýǵa bolatynyn jáne qaı jerde tyıym salynǵanyn naqty bilýi tıis, — dedi «AMANAT» partııasy janyndaǵy «Jastar rýhy» jastar qanatynyń Astana qalalyq fılıalynyń tóraǵasy Arslanbek Magzým.
Astana qalalyq Tótenshe jaǵdaılar departamentiniń málimetinshe, qazirgi ýaqytta kommýnaldyq jaǵajaıda sýǵa túsýge ruqsat berilgen. Degenmen jaǵajaı tolyq jabdyqtalmaǵan, bul baǵytta tıisti jumystar júrgizilip jatyr.
— Jasóspirimderdi qaraýsyz qaldyrmaý — basty talap. Ókinishke qaraı, kóp jaǵdaıda balalardyń sýǵa batý faktileri osyndaı salǵyrttyqtyń saldarynan bolady. Sonymen qatar, mas kúıinde sýǵa túsýge qatań tyıym salynady. Qalalyq reıdter kúndelikti júrgizilýde. 1 maýsymnan beri 11 adamǵa ákimshilik aıyppul salyndy. Onyń ishinde jasóspirimder de bar. Eger jasóspirim quqyq buzsa, ata-anasyna aıyppul salynady, — dedi TJD ókili Madı Qadyrjanuly.
3 maýsym kúni tyıym salynǵan jerde sýǵa shomylý kezinde 15 jastaǵy jasóspirimniń qaza tapqany tirkeldi. Sonymen qatar, eki jasóspirim men bir eresek adam qutqarylǵan.
Reıdtik is-shara barysynda keıbir turǵyndar tarapynan agressııalyq minez-qulyq baıqalǵan. Sondaı-aq mas kúıinde shomylý derekteri jıi tirkelip jatyr. Mundaı jaǵdaılarda quqyqtyq sharalar qoldanylady.
Búginde qala aýmaǵynda shomylýǵa arnalǵan 5 resmı oryn belgilengen: Ortalyq jaǵajaı, «Trı peskarıa» (Kóktal-1), «Armına», «Stolıchnyı dvor» jáne Sh. Beısekova kóshesinde kópir mańyndaǵy kommýnaldyq jaǵajaı.
Máslıhat sheshimimen sýǵa túsýge tyıym salynǵan ýchaskeler de naqty belgilengen. Alaıda keıbir jaǵajaılar áli tolyq jabdyqtalmaǵan.
— Atap aıtqanda, Saryarqa aýdany aýmaǵyndaǵy jaǵajaıdyń ınfraqurylymy áli tolyq aıaqtalǵan joq. Qurylys basqarmasynyń jobalaryna baılanysty jumystar jalǵasyp jatyr. Qazirgi ýaqytta jaǵajaıdy abattandyrý úshin ınvestor izdestirilýde. Bolashaqta bul nysanǵa kirý aqyly bolýy múmkin. Qazir jaǵajaıǵa kirý baqylaýsyz júrip jatyr. Sondyqtan turǵyndarmen túsindirý jumystaryn jalǵastyramyz, — dedi Saryarqa aýdany ákimdiginiń ókili Damır Ismatýlın.
«Qaýipsiz qala» aktsııasy — jazǵy maýsymda sý aıdyndarynda qaýipsizdik erejelerin saqtaý, qoǵamdyq tártip pen zań aıasynda profılaktıkalyq túsindirý jumystaryn júrgizýge baǵyttalǵan keń aýqymdy shara.
Aıta keteıik, bul bastama respýblıka kóleminde júzege asyrylyp jatyr.