Qaýip tónip turǵan kýrorttar: Alanııa men Antalııa mańyndaǵy teńizdiń lastanýy qaýipti deńgeıge jetti
ASTANA.KAZINFORM — Jerorta teńizindegi túrik kýrorttary ekologııalyq dabyl qaǵyp jatyr, dep habarlaıdy Kazinform tilshisi.
Túrkııanyń tanymal kýrorttary Alanııa men Antalııa aımaǵyndaǵy teńiz sýynyń lastanýy teńiz ekojúıesine de, demalýshylardyń densaýlyǵyna da qaýip tóndiretin shekti deńgeıge jetti, dep eskertti Jerorta teńizi ýnıversıtetiniń dotsenti Gýraı Dogan.
Mamannyń aıtýynsha, lastanǵan sýmen janasqan adamda qusý, júrek aıný, dene qyzýynyń kóterilýi jáne basqa da jedel ýlaný belgileri paıda bolýy múmkin. Qaýip tek týrısterge ǵana emes, sonymen qatar jergilikti turǵyndarǵa, teńiz florasy men faýnasyna da áser etedi.
Lastanýdyń negizgi kózi týrızm, aýylsharýashylyq, plastık qaldyqtary, klımattyń ózgerýi. Dogannyń aıtýynsha, sýdaǵy mıkrobıologııalyq lastaýshy zattardyń aıtarlyqtaı artýy baıqalǵan Alanııa men Gazıpash arasyndaǵy aımaq erekshe zardap shekti.
— Ekologııalyq ınjenerııa jalǵyz ǵana máseleniń aýqymyn kótere almaıdy, týrızm salasy men aýyl sharýashylyǵy ekologııalyq tepe-teńdikti qalpyna keltirý úshin kúsh biriktirýi kerek, — dep atap ótti ǵalym.
Sondaı-aq ekologııa mamandary qaldyqtardy basqarý júıesin keńeıtýdi, týrızm men aýyl sharýashylyǵyn birlesip tekserý baǵdarlamalaryn qurýdy, halyq pen týrıster arasynda ekologııalyq bilim berýdi kúsheıtýdi usyndy.
Jaǵdaı jýyrdaǵy Qara teńizdegi tankerdiń tógilýinen jappaı lastanýdan keıin alańdatarlyq jaǵdaıǵa aınaldy.
— Eger biz qazir áreket etpesek, kelesi jyly tym kesh bolýy múmkin, — dep eskertti Dogan.
Teńiz ortasyn qorǵaý boıynsha shuǵyl jáne keshendi sharalar qabyldanbasa, Jerorta teńizindegi ekologııalyq daǵdarys túrik týrızm ındýstrııasynyń ımıdjine orny tolmas zııan keltirýi múmkin.
Jel men ózenniń kómegimen Qara teńizge túsetin plastık qaldyqtar Túrkııadaǵy ekologtardy qatty alańdatyp otyrǵanyn buǵan deıin jazǵanbyz.