Qaýip tóndirgen júrgizýshiler: 2 myńǵa jýyq kýáliktiń kúshi joıyldy
ASTANA. KAZINFORM — Jol qozǵalysy qaýipsizdigin arttyrý maqsatynda Qazaqstanda densaýlyǵyna baılanysty kólik basqarýǵa quqyǵy joq azamattardyń júrgizýshi kýálikteri joıyla bastady. Búginge deıin 1 787 kýáliktiń kúshi toqtatylǵan. Bul týraly Densaýlyq saqtaý mınıstrligi málim etti.
Densaýlyq saqtaý mınıstrligi Іshki ister mınıstrligimen birlesip, medıtsınalyq qarsy kórsetilimderi bar adamdardyń kólik quraldaryn basqarýyna jol bermeý jáne olardyń qoljetimdiligin shekteý baǵytynda júıeli jumysty bastady. Bul shara jol qozǵalysyna qatysýshylardyń barlyǵynyń qaýipsizdigin qamtamasyz etýge, azamattardyń ómiri men densaýlyǵyn saqtaýǵa baǵyttalǵan.
— Eki vedomstvonyń arasyndaǵy tsıfrlyq ózara is-qımyldyń jáne ІІM-niń Densaýlyq saqtaý mınıstrliginiń «Dıspanserlik esepte turǵan patsıentterdiń elektrondyq tirkelimi» aqparattyq júıesine qosylýynyń nátıjesinde dıspanserlik esepte turǵan 369 888 adamǵa taldaý júrgizildi. Anyqtalǵandaı, olardyń 273 819-yna buryn júrgizýshi kýáligi berilmegen, — delingen habarlamada.
Qalǵan 96 069 adam boıynsha mynalar belgili boldy:
41 677 azamattyń júrgizýshi kýáligi derekter túsken sátte-aq jaramsyz (kúshi joıylǵan) bolǵan;
54 392 azamattyń júrgizýshi kýáligi qoldanysta bolǵan.
2025 jyldyń 10 jeltoqsanyndaǵy jaǵdaı boıynsha sot organdaryna 4 540 talap-aryz jiberilip, olardy qaraý nátıjesinde 1 787 júrgizýshi kýáliginiń kúshi joıyldy. Atalǵan azamattardyń medıtsınalyq qarsy kórsetilimderine baılanysty kólik quralyn basqarýǵa quqyǵy bolmaǵan.
Sonymen qatar, eki vedomstvonyń aqparattyq júıeleriniń arasynda psıhonevrologııalyq jáne narkologııalyq esepte turǵan azamattar týraly derekterdi naqty ýaqyt rejıminde berý jáne jańartý qamtamasyz etildi. Málimet almasý avtomattandyrylǵan formatta júzege asyrylady jáne kólik quralyn basqarýǵa ruqsat berý máselelerin qaraý kezinde qoldanylady.
Densaýlyq saqtaý mınıstrligi men Іshki ister mınıstrliginiń jol qaýipsizdigin baqylaý jáne jol-kólik oqıǵalarynyń qaýipterin azaıtý jónindegi birlesken jumysy derekterdiń tsıfrlyq almasýy arqyly jalǵasatyn bolady. Bul jańa shara JKO saldarynan halyqtyń jaraqattanýynyń, múgedektiginiń jáne óliminiń tómendeýine ákelýi tıis.
Buǵan deıin osy jyly Almatyda 3 myńnan astam júrgizýshi kýáliginen aıyrylǵanyn jazǵan edik.
