Qaýip artta qaldy: Abaı oblysynda evakýatsııalanǵan adamdar úılerine qaıtyp jatyr
SEMEI. KAZINFORM — Abaı oblysynda keıingi kúnderi tasqyn sý talaıdyń mazasyn qashyrdy. Jer jibip qatyp, dambylar men eldi mekenderdi qyzyl sý basty. Aıagóz jáne Aqsýat aýdandarynda qaýipsizdik maqsatynda turǵyndar arnaıy daıyndalǵan evakýatsııalyq pýnktilerge kóshirilgen edi. Qazirgi ýaqytta olar úılerine qaıtyp jatyr.
Oblys ákimi Nurlan Uranhaev Jarma jáne Aıagóz aýdandarynda sý basqan aýyldarǵa baryp, jaǵdaımen tanysty. Búginde jergilikti atqarýshy organdar men oblystyq TJD mamandary tarapynan erigen qar sýyn burý maqsatyndaǵy barlyq shara qabyldandy. Sonyń nátıjesinde, sý deńgeıi tómendedi. Sonymen qatar Aıagóz qalasynda oblys ákimi apparattyq keńes ótkizip, jaýapty organdar men bólimderge birqatar tıisti tapsyrma berdi.
Eske salsaq, 28 naýryzda Tarbaǵataı aýylyndaǵy Aıagóz ózeninde sý deńgeıi 365 sm-ge deıin kóterilip, Semeı qalasynan kómek kórsetý úshin oblystyq TJD kúshteri men quraldary jiberildi. Turǵyn úılerdi sý basýdyń aldyn alýǵa, halyqty evakýatsııalaýǵa Aıagóz qalasynyń arnaıy kúshteri men quraldary jumyldyrylǵan.
Keshe evakýatsııalanǵan Aqsýat aýdanyndaǵy Ýań aýylynyń turǵyndary da úılerine oraldy. Olar Boǵas ózenindegi sý deńgeıiniń kóterilýine baılanysty qaýipsiz jerge jetkizilgen bolatyn.
Dál osy sátte aýdandardaǵy jaǵdaı turaqty.
